Ագրամունտը սկանդալից հետո հանդիպել է հայաստանյան պատվիրակության ղեկավարի հետ

Եվրոպայի խորհրդի խորհրդարանական վեհաժողովում մենք աշխատում ենք միլի մեջլիսի ռեժիմով՝ թուրք-ադրբեջանական լոբբիի գերակայության պայմաններում: Այս մասին լրագրողների հետ զրույցում ասաց ԱԺ ԲՀԿ խմբակցության ղեկավար, ԵԽԽՎ-ում հայաստանյան պատվիրակության անդամ Նաիրա Զոհրաբյանը, ով աշնանային նստաշրջանում բանավեճ ունեցավ ԵԽԽՎ նախագահ Պեդրո Ագրամունտի հետ՝ իր խոսափողն անջատելու պատճառով ու անվանեց նրան ադրբեջանական լոբբիստ: Նաիրա Զոհրաբյանը նշեց, որ տեղի ունեցած միջադեպն աննախադեպ էր ԵԽԽՎ պատմության մեջ: «Ես զրուցել եմ ԵԽԽՎ հնաբնակների հետ, ծանոթացել եմ Վեհաժողովի կանոնակարգին ու կարող եմ ասել, որ Ագրամունտը կոպտագույն խախտում թույլ տվեց՝ անջատելով խոսափողը, թույլ չտալով իմ ելույթը ավարտել»,- նշեց Նաիրա Զոհրաբյանը: Պատգամավորը նշեց, որ Պեդրո Ագրամունտը միջադեպից հետո հանդիպել է ԵԽԽՎ հայաստանյան պատվիրակության ղեկավար Հերմինե Նաղդալյանի հետ ու նրա հետ զրույցում չի էլ պնդել, որ չի խախտել Վեհաժողովի կանոնակարգը: «Համապատասխան ընթացակարգերով մենք հետամուտ ենք լինելու, որ Ագրամունտը պատժվի: Մենք բարձրացրինք իր համար ցավոտ մի թեմա՝ Եվրոպայի խորհրդում կոռուպցիայի թեման, իսկ Ագրամունտը հայտնի կոռուպցիոներ է, դրա համար էլ ընկավ հիստերիայի մեջ, դրսևորեց անհավասարակշիռ պահվածք՝ ոչ հարիր ԵԽԽՎ նախագահին: Պատասխան է տալու իր բոլոր բառերի համար»,- նշեց Նաիրա Զոհրաբյանը՝ շեշտելով, որ որևէ մեկն իրավունք չունի անջատելու խոսափողը: