«Բա 4 տարի որտե՞ղ էիր թաքնվել, որ քար էիր հավաքում» . քաղաքագետը՝ Դալլաքյանին

«Եթե դու ընդդիմադիր ուժ չես ստեղծում օբյեկտիվորեն, իշխանությունն է ստեղծում: Ես կուզենայի, որ իրենց կիրքը մի քիչ չափավոր լիներ: Եղածը հերիք է»: Այս մասին այսօր «Հայելի» ակումբում ՀՀԿ-ին առաջարկեց քաղաքագետ Լևոն Շիրինյանը: Անդրադառնալով Hayeli.am-ի հարցին, թե ինչ ի նկատի ունի Վիկտոր Դալլաքյանը, երբ ասում է, թե եկել է իր՝ քարերը նետելու ժամանակը, քաղաքագետն ասաց.«Թող նետի, էլի: Բոլորն ասում են՝ բա 4 տարի որտե՞ղ էիր թաքնվել, որ քար էիր հավաքում: Ընդհանրապես նախագահի աշխատակազմում քար չեն հավաքում, ես Քոչարյանի ժամանակ աշխատել եմ նախագահականում: Այնտեղ կամ գիշեր-ցերեկ աշխատում են կամ չեն լինում: Հիմա եկել ի՞նչ է ասում: Եթե 4 տարի չես դիմել, թե ընկեր ջան, ինձ ինչի՞ ես պահում այստեղ, աշխատավարձից էլ չի հրաժարվել, ուրեմն Հարկային տեսչությունը պետք է այդ փողերը հետ ուզի: Բա ի՞նչ ես արել, հնարավո՞ր է դասախոս պահեմ, որը լսարան չմտնի: Հաջորդ օրը կասեմ՝ գնա, աշխատավարձ չկա»: Մեր մյուս հարցին, համամիտ է այն կարծիքին, թե որ Դալլաքյանին գործուղել են ընդդիմադիր դաշտ, քաղաքագետը պատասխանեց. «Կարող է գործուղել են, դա լավ բանի մասին չի խոսում: Իսկ եթե չեն գործուղել, դուք դրսևորել եք պատեհապաշտ քաղաքական վարքագիծ:  Հիմա կտեսնենք, դուք պատրա՞ստ եք Դալլաքյանի կուսակցության անդամ դառնալ: Եթե միտինգները թողեցին՝ նախագահականից գործուղել են, եթե չթողեցին, պլակատները գողացան, ուրեմն՝ չէ»: Քաղաքագետը նշեց նաև, որ Դալլաքյանը լավ խորհրդարանական է եղել, բայց կյանքն ապացուցում է, որ դա դեռ չի նշանակում լավ քաղաքական գործիչ լինել: Կարինա Սահակյան