Նոր մանրամասներ՝ Նուբարաշենի նախկին թաղապետի ողբերգական ավտովթարից. ՖՈՏՈՌԵՊՈՐՏԱԺ, ՏԵՍԱՆՅՈՒԹ

Հայաստանի քննչական կոմիտեի Արարատի մարզային քննչական վարչության ավագ քննիչ Նորայր Այվազյանի կողմից հարուցված քրեական գործի շրջանակում պարզվել է՝ հոկտեմբերի 11-ին Արարատի մարզում տեղի ունեցած ողբերգական ավտովթարի ժամանակ Nissan Patrul մակնիշի 10 PO 010 համարանիշի ավտոմեքենայի վարորդի և 4-րդ վիրավորի ինքնությունը: Ինչպես հայտնում է ֆոտոլրագրող Գագիկ Շամշյանը, նյութերի նախապատրաստման ընթացքում պարզվել է, որ ավտոմեքենան վարել է Նուբարաշեն վարչական շրջանի բնակիչ, Նուբարաշենի նախկին թաղապետ, 37-ամյա Մհեր Հովհաննիսյանը: 4-րդ վիրավորը եղել է Արարատի մարզի Ջրաշեն գյուղի բնակիչ, 32-ամյա Վլադիկ Աբրահամյանը: Ավագ քննիչի որոշմամբ նշանակվել են մի շարք փորձաքնություններ, այթ թվում՝ տեխնիկական, մանրաթելային, մատնահետքաբանական, մատնադրոշմային և դիակի դատաբժշկական: Ինչպես ավելի վաղ դեպքի վայրից հայտնել էր ֆոտոլրագրողը, հոկտեմբերի 11-ին, խոշոր ու ողբերգական ավտովթար էր տեղի ունեցել Արարատի մարզում։ Ժամը 05։00-ի սահմաններում Արտակարգ իրավիճակների նախարարության փրկարար ծառայության օպերատիվ կառավարման կենտրոն ահազանգ էր ստացվել, որ Արարատի մարզի Քաղցրաշեն գյուղի վարչական տարածքի Դիատամիտ հանքի հարևանությամբ գտնվող ձորը ավտոմեքենա է ընկել։ Օպերատիվորեն նշված վայր էին ժամանել Արարատի մարզային փրկարարական վարչության հերթապահ խումբը՝ մարզի վարչության պետ, փրկարար ծառայության գնդապետ Մուրադ Մարգարյանի գլխավորությամբ, լրացուցիչ ժամանել էին նաև Արտաշատի հրշեջ-փրկարարական ջոկատը՝ 1 մարտական հաշվարկով՝ ջոկատի պետ Արմեն Միքայելյանի գլխավորությամբ։ Փրկարարներին էին միացել նաև ՃՈ 2-րդ սպայական գումարտակի 1-ին վաշտի 2-րդ դասակի աշխատակիցները՝ վաշտի հրամանատարի տեղակալ Յուրա Հովհաննիսյանի, դասակի հրամանատար Սանասար Հարությունյանի գլխավորությամբ։ Այնուհետև փրկարարներին ու ՃՈ աշխատակիցներին էին միացել Քաղցրաշեն վարչական շրջանի ղեկավար Վալերի Գյուլամիրյանը և Նարեկ վարչական շրջանի ղեկավար Գարուշ Հակոբյանը։ Որոնողական աշխատանքներին մասնակցել էին նաև մեծ թվով գյուղացիներ և Նուբարաշեն վարչական շրջանում բնակվող քաղաքացիներ։ Ահազանգողը չէր կարողացել հստակ մատնանշել վթարի վայրը, գրեթե մի քանի ժամ շարունակվել էին որոնողական աշխատանքները և միայն առավոտյան ժամը 08։30-ի սահմաններում նշված հանքի հարևանությամբ գտնվող ձորում ճանապարհից մոտ 100 մետր խորության մեջ հայտնաբերվել էր Nissan Patrul մակնիշի 10 PO 010 համարանիշի ավտոմեքենան։ Փրկարարներն ու քաղաքացիները ավտոմեքենայից դուրս հայտնաբերել էին Նուբարաշեն վարչական շրջանի 5-րդ փողոցի 9-րդ տան բնակիչ, 37-ամյա Մհեր Հովհաննիսյանի դին։ Քաղաքացիներն իրենց անձնական օգտագործման ավտոմեքենաներով հիվանդանոց էին տեղափոխել վիրավորներից Նուբարաշեն վարչական շրջանի բնակիչներ, 32-ամյա Ռաֆայել Կարմաջյանին և 36-ամյա Կարեն Ներսիսյանին։ Վթարի մասին ՃՈ օպերատիվ կառավարման կենտրոնի պատասխանատու հերթապահ Արսեն Հարությունյանը տեղեկությունը փոխանցել էր Հայաստանի քննչական կոմիտեի Արարատի մարզային քննչական վարչություն, որտեղից ժամանել է քննչական խումբը՝ ավագ քննիչ Նորայր Այվազյանի գլխավորությամբ, ում կողմից փաստի առթիվ հարուցվել էր քրեական գործ՝ ՀՀ քր.օր-ի 242 հոդվածի 2-րդ մասի (ճանապարհատրանսպորտային պատահար, որն անզգուշությամբ առաջացրել է մարդու մահ) հատկանիշով։ Ողբերգական ավտովթարի հետևանքով մահացած, Նուբարաշենի նախկին թաղապետ Մհեր Հովհաննիսյան Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: Դեպքի մանրամասները դիտեք առաջիկա կիրակի Արմենիա հեռուստաընկերության «Սուր անկյուն» հաղորդաշարի եթերում` հոկտեմբերի 16-ին, ժամը 22:00-ին: Լուսանկարները և տեսանյութը՝ Գագիկ Շամշյանի