Մենք ոչ ոքով ո՛չ գայթակղվելու ենք, ոչ էլ կասենք, թե ամեն ինչ կփոխի. Ռուբիկ Հակոբյան

ՀՀ վարչապետի թեկնածու Կարեն Կարապետյանին պետք է գնահատել իր աշխատանքով, և բացի այդ, նա ունի ստորագրություն, որը որոշակիորեն դրական ընկալում ունի: Այս մասին Ազգային ժողովում լրագրողների հետ զրույցում ասաց ԱԺ պատգամավոր Ռուբիկ Հակոբյանը՝ հավելելով, որ ինքը չգիտի՝ Կարեն Կարապետյանը իշխանության թիմի անդա՞մն է, թե ոչ: Դիտարկմանը, թե եթե փորձում է գնահատել Կարեն Կարապետյանին իր կատարած աշխատանքով, ապա Կարեն Կարապետյանը Երևանի քաղաքապետի պաշտոնից հրաժարվեց՝ ասելով, որ իրենք ավելի լավ աշխատանք են առաջարկել, Ռուբիկ Հակոբյանն ասաց. «Ես խոհանոցին չեմ տիրապետում, թե ինչու հեռացավ քաղաքապետի պաշտոնից, սակայն կարող եմ ասել, որ նա ունի ստորագրություն, որը որոշակիորեն դրական ընկալում ունի։ Բայց տառապանքի փորձից ելնելով՝ մենք ոչ ոքով ոչ գայթակղվելու ենք, ոչ էլ կարող ենք ասել, որ եկավ, ամեն ինչ կփոխի: Ես կարծում եմ, որ և՛ քաղաքական մեծամասնության, և՛ ոչ իշխանական ուժերի մեջ կա մեծ պոտենցիալ, որը ես տեսնում եմ: Տեսնում եմ, որ դրական տեղաշարժ կա, իսկապես եկել է նոր շունչ, նոր ծրագիր»: Հարցին, թե Կարեն Կարապետյանին կհաջողվի՞ պայքարել կոռուպցիայի դեմ, կրճատել ստվերը, եթե նույն վարչական լծակներն են, նույն գործարարները, Ռուբիկ Հակոբյանն ասաց, որ դեռ չի ցանկանում գնահատական տալ։ «Կանխավ գնահատելը ճիշտ չէ, բայց ես կարծում եմ, որ եթե այդ ընկալումը չկա, ապա Կարեն Կարապետյանն ինչո՞ւ պիտի գար, հասներ այստեղ, այն դեպքում, երբ իր համար ամեն ինչ լավ էր Մոսկվայում: Եթե իսկապես նոր ծրագրով եկած չլիներ, որտեղ նոր էջ պիտի բացվի, ուրեմն ամեն ինչ իզուր է»,-ասաց Ռուբիկ Հակոբյանը և հորդորեց սպասել: