Արցախի հարցն այսօր կքննարկեն Մոսկվայում
Ադրբեջանական APA լրատվական գործակալության փոխանցմամբ՝ այսօր Ռուսաստանի մայրաքաղաք Մոսկվայում կանցկացվեն խորհրդակցություններ Ղարաբաղյան հակամարտության կարգավորման հարցով: Այս մասին հայտնել է լրատվամիջոցի մոսկովյան թղթակիցը: Խորհրդակցությունների համար Մոսկվայում են հավաքվելու ԵԱՀԿ Մինսկի խմբի համանախագահները՝ Ջեյմս Ուորլիքը (ԱՄՆ), Իգոր Պոպովը (Ռուսաստան) և Պիեռ Անդրիեն (Ֆրանսիա): Միջոցառմանը մասնակցելու է նաև ԵԱՀԿ գործող նախագահի անձնական ներկայացուցիչ Անջեյ Կասպրշիկը: Քննարկվելու են Ղարաբաղյան հակամարտության կարգավորման հրատապ հարցեր: Հատուկ ուշադրություն է հատկացվելու այն պայմանավորվածությունների իրագործման ընթացքին, որոնք ձեռք են բերվել մայիսի 16-ին Վիեննայում և հունիսի 20-ին Սանկտ Պետերբուրգում Ղարաբաղյան հակամարտության կարգավորման վերաբերյալ անցկացված հանդիպումներում: Ակնկալվում է, որ համանախագահները կհանդիպեն ՌԴ ԱԳՆ ղեկավարության հետ:
