Ես չեմ կարծում, որ այդ աննշան կորուստներն անվերադարձ են. Լևոն Մնացականյան
Ռազմական գործողությունների վերսկսման հավանականությունը միշտ կա, ավելին՝ այն բարձր է։ Այդ մասին հայտարարել է ԼՂՀ պաշտպանության նախարար Լևոն Մնացականյանը REGNUMգործակալությանը տված հարցազրույցում: «Սկսենք հարցի առաջին մասից: Իսկ ո՞վ է ասել, որ կորուստները մեծ են: Բնական է, մեզ համար յուրաքանչյուր կորուստ կարեւոր է, եւ մենք անթույլատրելի ենք համարում ցանկացած կորուստ: Բայց ռազմական գործողությունները հենց նրանով էլ դաժան են, որ դրանց հետեւանքով լինում են ինչպես անձնակազմի, այնպես էլ նյութական կորուստներ: Ուստի, խոսել այն մասին, թե շատ կամ քիչ են եղել կորուստները, եւ ընդհանրապես նման գնահատականներ տալը սխալ է: Եվ ընդհանրապես, ԶԼՄ-ներում զոհերի մասին թվերը իրականությանը չեն համապատասխանում: Ինչ վերաբերում է հարձակվող ադրբեջանական զորքերին, նրանց կորուստները մի քանի անգամ գերազանցում են մեր կորուստները: Եվ դա հաշվի առնելով այն, որ նրանք օգտագործել են անսպասելիության գործոնը եւ էլիտար զորամիավորումներ: Այդ պատճառով, ես կարծում եմ, որ ԼՂՀ պաշտպանության բանակն իր խնդիրը պատվով է կատարել: Եվ հակառակորդը հասկացել է, որ նրա հետագա հարձակողական բոլոր գործողությունները կավարտվեն ձախողմամբ»,- ասել է նա: Ինչպես ասել է՝ ամեն դեպքում, չենք իմացել, որ հարձակման մասշտաբներն այդպիսին կլինեն: Այդ իմաստով որոշակի բացթողումներ եղել են: Շփման գծի ողջ երկայնքով հարվածի մենք չէինք սպասում: Դրա հետեւանքով մենք կորցրեցինք որոշ հենակետեր, սակայն իրականում դա չազդեց ԼՂՀ ՊԲ հնարավորությունների վրա: Զորքերը շարունակում են ամբողջությամբ կատարել իրենց խնդիրներն առաջնագծում.«Իհարկե, լավ կլիներ, եթե այդ դիրքերը եւս չկորցնեինք: Այնուամենայնիվ, այն կարճ ժամանակահատվածում, որ կար մինչեւ հրադադարը, մենք զգալիորեն վերականգնել ենք կորսված դիրքերը: Եթե ռազմական գործողությունները շարունակվեին, մենք ավելի լայն հնարավորություններ կունենայինք: Ամեն դեպքում, ես չեմ կարծում, որ այդ աննշան կորուստներն անվերադարձ են, եւ ես համոզված եմ, որ մենք դեռ հնարավորություններ կունենանք մեր կորցրած դիրքերը վերադարձնելու համար»: Նախարարը, պատասխանելով Ադրբեջանի հնչեցրած սպառնալիքների մասին հարցին, հայտարարել է, որ «եթե Ադրբեջանը հարված հասցնի Ստեփանակերտին, կձեռնարկվեն համապատասխան միջոցներ»: «Թե ինչ միջոցներ՝ թող նրա համար գաղտնիք մնա: Պարզապես պատասխանն անհամեմատելի կլինի»,- ասել է նա:
Հետևեք մեզ Viber-ում
