Ոստիկանները զինատեսակները պետք է գործածեն ոչ թե ժողովրդի դեմ, այլ սահմանին. Թամար Հովհաննիսյան

Դժվար է ասել, թե դատարանն Անդրիաս Ղուկասյանի գործով ինչ որոշում կկայացնի, սակայն ավելի քան պարզ է, որ նա պետք է ազատ արձակվի առանց գրավի: Լրագրողների հետ այսօր կայացած հանդիպման ժամանակ նման համոզմունք հայտնեց վերջինիս կինը` ճարտարապետ Անահիտ Թարխանյանը: «Դժվար է պատկերացնել, որ Անդրիասը կարող էր զանգվածային անկարգություններ հրահրել: Նա լուրջ անձնավորություն է: Դատարանը պետք է հաշվի առնի նրա անձնական բնութագիրը, վերանայի նրա` սկզբունքային մոտեցումներով հանրային ելույթները: Այդ բոլոր ելույթները գտնվել են օրինականության դաշտում»,- նկատեց ճարտարապետը: Ասուլիսին ներկա հանրային գործիչ, դերասանուհի Թամարա Հովհաննիսյանն էլ իր հերթին նկատեց, որ արդարադատությունը պետք է հենված լինի տրամաբանության վրա, մինչդեռ Սարի թաղի դեպքերից հետո կալանավորվածների գործերում տրամաբանություն չկա: Ավելին՝ այդ օրերին ոստիկանները գործածում էին զինատեսակներ, որոնք պետք է ոչ թե սեփական ժողովրդի դեմ ուղղեին, այլ գործի դնեին սահմանում: «Ինչ վերաբերում է կոնկրետ Անդրիաս Ղուկասյանին ներկայացված մեղադրանքներին, ապա դրանք կեղծ են, թխած: Նրա նման կիրթ մարդն ուղղակի չէր կարող ցուցարարներին հորդորել քարերով խփել ոստիկաններին: Նա շատ լավ գիտի` ինչ է քաղաքացիական անհնազանդությունը և դա երբեք չէր կարող շփոթել քարերով ոտիկաններին հարվածելու հետ: Բացարձակ արդար մարդկանց կեղծ մեղադրանքներով կալանավորելն, իսկ հետո ազատության դիմաց նրանցից գումարներ գանձելն էլ մեկ այլ ապօրինություն է: Այդ մարդկանց փոխարեն կան իսկական հանցագործներ, որոնք պետք է լցնեն բանտերը: Բոլորի համար նույն բառերով մեղադրանքներն են, միայն անուններ են փոխված: Սա արդարադատություն չէ»,- ամփոփեց դերասանուհին: