2016-ին սոցփաթեթի հանգստի բաղադրիչը դեռ գործելու է.նախարար

Կառավարության նիստից հետո լրագրողների հետ զրույցում  ՀՀ աշխատանքի և սոցիալական հարցերի նախարար Արտեմ Ասատրյանը նշեց.«Սոցիալական փաթեթներով առաջարկվող հանգստի բաղադրիչը 2016 թվականի համար գործելու է, այն կասեցվելու միայն 2017 թվականից: Դեռևս խոսք չի գնում բաղադրիչը հանելու մասին, ինչպես վարչապետը նշեց, խոսքը կասեցնելու մասին է՝ 2017-2019 թվականների միջնաժամկետ ծախսերի շրջանակում: Վարչապետի հանձնարարությամբ իրականացվող ուսումնասիրություններն առաջիկայում կավարտվեն և բյուջետային հայտի շրջանակում արդեն կքննարկվի վերջնական որոշում կայացնելու հարցը: Բաղադրիչն այս տարի գործելու է, բնականաբար: Այս պահի դրությամբ՝ 2017-ի համար միջնաժամկետ ծախսերի ծրագրով այդ մասով ծախսեր նախատեսված չեն»: Դեռևս վաղ է վերջնական եզրակացություն անել, թե ինչպիսի՞ն կլինեն լուծումներըԴրանք կլինեն օբյեկտիվ, ճիշտ և ելնելով իրավիճակից, հաշվի առնելով նաև այն հանգամանքը, որ ծրագրից կան շատ պարտաճանաչ օգտվողներ,հայտարարեց նախարարը և հավելեց,որ  պետբյուջեում սոցփաթեթի հետ կապված միջոցների ծավալը կազմում է 10 մլրդ դրամ, իսկ դրանից օգտվողների թիվը հասնում է 100 հազարի.«Չարաշահումները հետևյալում են. շատ դեպքերում չմատուցված ծառայությունների դիմաց կատարվում են վճարումներ, այդ կարգի խնդիրներ են եղել: Ավելի մանրամասն ուսումնասիրությունների արդյունքներն առաջիկայում կներկայացվեն: Վարչապետի ներկայացրած տեղեկատվությունն ունի օբյեկտիվ հիմք և ամբողջական պատկերը ներկայացնելուց հետո որոշումը կկայացվի: 2016-ի հետ կապված որևէ խնդիր չկա»: