Սիրիական պատերազմի հետևանքով Լիբանանում է շուրջ 15 հազար սիրիահայ

Սիրիական պատերազմի հետևանքով Լիբանանում է Սիրիայից դուրս եկած շուրջ 15 հազար հայ: Այս մասին «Արմենպրես»-ի հետ զրույցում նշել է Մերձավոր Արևելքի Հայ դատի գրասենյակի պատասխանատու Վերա Յակուբյանը: «Լիբանանը Սիրիայի սահմանին ամենամոտն է, և հասկանալի է, որ Սիրիայից մեծ հոսք կա դեպի Լիբանան: Սիրիայից դեպի Լիբանան սիրիահայերի հոսքի ավելացում է նկատվում հատկապես վերջին 2-3 տարիների ընթացքում, երբ Հալեպում իրավիճակը վատացավ»,-ասել է Վերա Յակուբյանը: Հենց առաջին օրվանից սիրիահայերի կողքին կանգնած է եղել Լիբանանի հայ համայնքը: Վերա Յակուբյանը վստահեցրել է, որ Լիբանանի հայ համայնքը սիրիահայերին օգնում է բոլոր հնարավոր միջոցներով: «Չպետք է մոռանալ, որ Լիբանանում էլ տնտեսական դժվարություններ կան, սակայն, ամեն դեպքում, հայկական համայնքը կանգնած է սիրիահայերի կողքին: Տրամադրվող աջակցությունը թե նյութական է, թե բարոյական»,-նկատել է Վերա Յակուբյանը: Նրա տեղեկացմամբ Լիբանանում գտնվող սիրիահայերի հիմնական մասն այս կամ այն կերպ տեղավորված են: Համայնքն իր կապերով, հնարավորություններով մատչելի պայմաններով վարձակալության համար բնակարաններ է գտնում: Բոլոր վարժարաններում երեխաների գրեթե անվճար են սովորում, առողջապահական ծրագրերից են օգտվում:  Ամեն ինչ արվում է, որ նրանք իրենց զգան ապահով և հանգիստ: «Այնպիսի տպավորություն չլինի, թե սիրիահայերը նստում ու սպասում են նյութական օգնության: Շատ ընտանիքների համար, տրամադրվող աջակցությունից բացի, մենք ստեղծում ենք պայմաններ, որ կարողանան աշխատել իրենց  նվազագույն կարիքները հոգալ»,-հավելել է Վերա Յակուբյանը: Պատերազմը սկսվել է 2011 թվականի մարտի 15-ին ու դեռ շարունակվում է: ՄԱԿ-ի փախստականների հարցերով գերագույն հանձնակատարի 2015 թվականի զեկույցի համաձայն՝ Սիրիայից աշխարհի տարբեր երկրներ տեղափոխված փախստականների թիվը 4 մլն-ից ավելի է: