Պաշտոնյաները հայտարարում են՝ հանգստանալու են Արցախում, բայց Սան Ռեմոյում համարներ են բրոնյա անում. Նաիրա Զոհրաբյան

Ազգային ժողովի որոշ պատգամավորներ հայտարարել էին, որ իրենց հերթական արձակուրդը պատրաստվում են անցկացնել Արցախում: Hayeli.am-ի հետ զրույցում ԲՀԿ խմբակցության ղեկավար Նաիրա Զոհրաբյանը, խոսելով պատգամավորների կողմից Արցախում հանգստանալու վերաբերյալ  հայտարարությունների մասին, նշեց. «Թույլ տվեք տարբերվել գրեթե  բոլոր պաշտոնյաներից, պատգամավորներից,  և չհնչեցնել՝  «Իմ հանգիստն անցկացնելու եմ Արցախում» հայտնի նախադասությունը: Իսկապես, սիրելով և գնահատելով Արցախը, հայտարարում եմ՝  իմ  ամառային արձակուրդն  այնտեղ չեմ անցկացնելու: Գիտեք՝ շատերի համար հայրենասիրությունը մի տեսակ փեշակ է դարձել, նույնիսկ իրենց կենցաղ են փորձում կեղծ հայրեանսիրության տարրեր ներդնել: Վստահ եմ՝ բոլորը միաբերան հայտարարում են, թե իրենց հանգիստն Արցախում են անցկացնելու, բայց նիցաներում, սան ռեմոներում համարներ են բրոնյա անում: Կարելի է լրագրողական հերթապահություն սահմանել և տեսնել՝ էդ հայտարարողներից քանիսն են իրենց նիցաները թողնելու և գան Արցախ: Չի՛  կարելի Արցախը շահարկելով էժանագին դիվիդենտներ հավաքել: Հանգիստ թողե՛ք Արցախը և էժան PR դիվիդենտներ վաստակեք այլ տիրույթներում, եթե դա Ձեզ պատիվ է բերում»: ԲՀԿ խմբակցության ղեկավարի խոսքով՝  որևէ տեղ չի մեկնելու հանգստի, քանի որ առջևում նաև ՏԻՄ ընտրություններն են և մարզային այցերը բավական խիտ են: «Ընտանիքիս մյուս անդամները մեկնելու են Հունաստան: Եթե ստացվի, գոնե երեք-չորս օրով կփորձեմ միանալ նրանց, որովհետև ինձ համար հանգիստը  ծովն է,  բացառապես՝ Միջերկրական ծովը»: Հարցին, թե նախընտրում է հանգստանալ Հայաստանում թե դրսում, տիկին Զոհրաբյանը պատասխանեց.«Ո՛չ,  երբեք չեմ հանգստանա ՀՀ-ում: Անմակարդակ սպասարկում, գլխից մեծ գներ. ես նման տեղում  երբեք չեմ  կարող հանգստանալ:Այդքան հարուստ չեմ Հայաստանում հանգստանալու շռայլությունն ինձ թույլ տալու համար:  Նույնիսկ Միջերկրական ծովափերում  մեկշաբաթյա հանգիստը շատ ավելի մատչելի է, քան Հայաստանում»,-խոսքը եզրափակեց ԲԿՀ խմբակցության ղեկավարը: