Էթիկայի հանձնաժողովի նախագահը 120 հազար դոլարով բնակարան է գնել

Բարձրաստիճան պաշտոնատար անձանց էթիկայի հանձնաժողովի նախագահ Սիրանուշ Սահակյանն իր իսկ ղեկավարած հանձնաժողովին է ներկայացրել իր եկամուտների եւ ունեցվածքի հայտարարագիրը, որից պարզ է դառնում, որ նա նախորդ տարի 57 միլիոն 600 հազար դրամով (120 հազար ԱՄՆ դոլար) բնակարան է գնել: Սիրանուշ Սահակյանն իր Mersedes-Benz CLK 500 տիպի մեքենան նույն տարում 5.5 միլիոն դրամով վաճառել է: Այս մեքենան նա ձեռք էր բերել էթիկայի հանձնաժողովի նախագահությունը ստանձնելուց առաջ: Բարձրաստիճան պաշտոնատար անձանց էթիկայի հանձնաժողովի նախագահի դրամական միջոցները 2015 թվականի սկզբին կազմել են՝ 20 հազար եվրո, 7.2 հազար ԱՄՆ դոլար, 23 հազար շվեյցարական ֆրանկ եւ 500 հազար դրամ, որոնք տարվա վերջում դարձել են 4 հազար եվրո եւ 2 միլիոն դրամ: Սիրանուշ Սահակյանը նախորդ տարի եկամուտ է ստացել աշխատավարձից՝ 9.3 միլիոն եւ 315 հազար դրամ, ստացած փոխառությունից (վարկ)՝ 70 հազար շվեյցրական ֆրանկ (33.6 միլիոն ՀՀ դրամ), գույքի օտարումից՝ 5.5 միլիոն դրամ, քաղաքացիաիրավական այլ պայմանագրերից` 181 եւ 100 հազար դրամ: Բացառությամբ ստացած վարկից՝ նրա ընդհանուր եկամուտը նախորդ տարի կազմել է 15 միլիոն 400 հազար դրամ:   armtimes.com