Ղարաբաղի հիմնախնդրի կարգավորման թեման ունի իր քննարկման ձևաչափը. Զախարովա
ՌԴ արտաքին գերատեսչությունը Ադրբեջանին խորհուրդ է տալիս «չձգել պարանը» և տարբերակել Ղարաբաղի հարցով բանակցությունները հանրային քննարկումներից: Լրագրողների հետ հանդիպման ժամանակ այդ մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան՝ մեկնաբանելով Սանկտ-Պետերբուրգում կայացած եռակողմ արդյունքների վերաբերյալ Ադրբեջանի նախագահ Իլհամ Ալիևի՝ վերջերս արված հայտարարությունը: «Մենք կարծում ենք, որ մասնավորապես Լեռնային Ղարաբաղի հիմնախնդրի կարգավորման թեման ունի իր քննարկման ձևաչափը: Մենք լավ ենք հասկանում, որ հաշվի առնելով նրա պատմությունը, զգայունությունը, առկա է այն մեկնաբանելու բացատրություններ և այլ բաներ անելու մեծ ցանկություն և ձգտում: Սակայն պետք է բաղդատել բացատրությունները հրապարակային բանավեճերից և հանրային տարածությունը՝ այս բարդագույն հարցը լուծելու մեջ օգտագործելու փորձերից: Դրա լուծման համար առկա է բանակցային գործընթաց, որ կազմված է տարաբնույթ մեխանիզմներից: Դրանք գագաթաժողովներն են, երկկողմ և բազմակողմ ձևաչափերով հանդիպումները: Տեղի է ունեցել սանկտպետերբուրգյան հանդիպումը. ըստ բոլոր մասնակից կողմերի և դիտորդների՝ այն անցել է հաջող»,-Panorama.am-ի փոխանցմամբ՝ նշել է Զախարովան: Նա հիշեցրել է, որ պետերբուրգյան հանդիպումը ավարտվել է համապատասխան հայտարարության ընդունմամբ, որը հրապարակվել է: «Այս հայտարարությունն ամբողջությամբ և լրիվության այն մակարդակով, որն այս փուլում հնարավոր է՝ համաձայնեցված է կողմերի միջև, բացում է ինչպես հանդիպման, այնպես էլ՝ առաջ ընթանալու ճանապարհների և հեռանկարների մանրամասները և արդյունքները»,- նշել է Զախարովան: «Հիմա շատ կարևոր է հրապարակային հայտարարությունների և հռետորաբանության ընթացքում չվատնել այն դրականը, որը հաջողվել է ձեռք բերել: Այն պետք է պահպանել, որպեսզի հետագայում հնարավոր լինի իրագործել կոնկրետ քայլերում և գործերում»,- ասել է ԱԳՆ պաշտոնյան: Զախարովայի խոսքով, առկա են թեմաներ, որոնք ուղղակի «պահանջում են լռություն»: «Կարևոր է ցույց չտալ, թե ով է ավելի ուժեղ և ով է ավելի շատ միավորներ վաստակել: Այստեղ կարևոր է անել այնպես, որպեսզի գծանշվի խնդրի լուծման ճանապարհը և որ խնդրի լուծումը տեղափոխվի գործնական հարթություն: Մենք երկրորդ մոտեցման կողմնակիցն ենք: Դրա հետ մեկտեղ անկասկած հասարակությանը տեղեկացումը կարևոր տարր է»,- ասել է Զախարովան: Վերջինիս խոսքով՝ կլինեն տվյալներ, որոնք հնարավոր կլինեն մեկնաբանել, և դա կիրականացվի: «Մենք սկզբում խնդրանքով դիմել ենք բոլոր կողմերին, որպեսզի Լեռնային Ղարաբաղի հակամարտության կարգավորման գործընթացը իրականում առաջ ընթանա և բանավեճի համար օգտագործել բանակցային գործընթացը, այլ ոչ թե հանրային տարածությունը»,- նշել է Մարիա Զախարովան:
Հետևեք մեզ Viber-ում
