Զանգ Պուտինին. Ցավոտ հարցերի մասին լռում են

Հայաստանի վարչապետ Նիկոլ Փաշինյանը հեռախոսազրույց է ունեցել Ռուսաստանի նախագահ Վլադիմիր Պուտինի հետ:

Վարչապետի տեղեկատվության և հասարակայնության հետ կապերի վարչությունը տեղեկացնում է, որ վարչապետը շնորհավորել է Ռուսաստանի նախագահին ծննդյան օրվա կապակցությամբ։ «Զրուցակիցներն անդրադարձել են նաև օրերս Երևանում՝ Եվրասիական բարձրագույն խորհրդի նիստից հետո կայացած հանդիպման ժամանակ ձեռքբերված պայմանավորվածությունների կատարման ընթացքին», ասվում էր հաղորդագրությունում:

Երևանում կայացած ԵԱՏՄ-ական հավաքից հետո Ադրբեջանի նախագահի, Ադրբեջանի ԱԳՆ-ի կողմից քննադատություններ հնչեցին Փաշինյանի ուղղությամբ: Բացի այդ, նշյալ քննադատությունները հնչեցին այն բանից հետո, երբ Ռուսաստանի արտգործնախարարը ուղիղ քննադատեց Փաշինյանի ստեփանակերտյան հայտարարությունը՝ «Արցախը Հայաստան է, և վերջ»:

Արդյոք Փաշինյանը խոսել է ռուս-ադրբեջանական «դիվերսիայի» մասին՝ ընդդեմ Հայաստանի ու Արցախի, թե՞ միայն սահմանափակվել է ԵԱՏՄ-ական հանդիպումներում ձեռքբերված պայմանավորվածությունների թեմայի վրա:

Ի դեպ, չի բացառվում, որ Փաշինյանն ու Պուտինը քննարկած լինեն Երևանում ղարաբաղյան հարցը, և ռուսական կողմը Փաշինյանին ինչ-որ ձևով հասկացրած լինեն, որ ԼՂ հարցում կլինեն կոշտ հայտարարություններ թե՛ ռուսական կողմից, թե՛ ադրբեջանական:

Հավելենք, որ Պուտինը երեկ նշում էր իր 67-ամյակը: Ռուսաստանի նախագահն իր 67 ամյակի նախօրեին ժամանել է Սիբիր:

РИА "Новости" գործակալության տարածած կարճ տեսանյութից պարզ է դառնում, որ Ռուսաստանի ղեկավարին ընկերակցում է պաշտպանության նախարար Սերգեյ Շոյգուն: Տեսագրությունում պատկերված է, թե ինչպես են Պուտինը և Շոյգուն զբոսնում տայգայում, սունկ հավաքում, ինչպես նաև լեռնագագաթներից մեկից հիանում Սիբիրի խոշորագույն գետերից մեկով` Ենիսեյով:

Կրեմլի մամուլի խոսնակ Դմիտրի Պեսկովի խոսքով՝ Պուտինը ծննդյան օրն անցկացնում է «բնության գրկում` հարազատների շրջապատում»: Նախորդ երկու տարիներին Պուտինի ծննդյան օրվա տոնակատարություններին մասնակցելու նպատակով Ռուսաստան էր ժամանում Իտալիայի նախկին վարչապետ Սիլվիո Բերլուսկոնին: 2013-ին իր 61-րդ տարեդարձը Ռուսաստանի նախագահը նշում էր Չինաստանի ղեկավար Սի Ծինփինի հետ միասին:

Թամար Բագրատունի