Մեծ գործարքը մոտենում է. Հայաստանի հարևանի հետ կբանակցեն

Նախագահ Դոնալդ Թրամփը չի բացառել ԱՄՆ կողմից Իրանի նկատմամբ պատժամիջոցների մեղմացումը, եթե նախագահ Հասան Ռոհանին մասնակցի բանակցություններին:

Թրամփը կրկին ակնարկել է, որ հանդիպումը Իրանի նախագահի հետ հնարավոր է: «Այո՛, այն կարող է տեղի ունենալ: Խնդիր չկա հանդիպման հետ: Իրանը պետք է շահագրգռված լինի, քանի որ նրանք վատ վիճակում են այժմ»,- հայտարարել է Թրամփը:
Նախագահն ընդգծել է, որ Իրանը ցանկանում է հասնել համաձայնության, քանի որ ունի լուրջ ֆինանսական խնդիրներ, իսկ պատժամիջոցները գնալով ավելի ու ավելի շատ են ծանրանում: Իրանի նախագահ Ռոհանին, սակայն բացառել է հանդիպումը, եթե պատժամիջոցները պահպանվեն: Իրանի նախագահը հանդիպումը որակում է «անիմաստ» այդ պարագայում:

Հիշեցնենք, որ իշխանության գալուց հետո նախագահ Թրամփը ԱՄՆ դուրս է բերեց 2015թ. միջուկային համաձայնագրից և վերականգնեց պատժամիջոցները Իրանի դեմ: Ֆրանսիան փորձում է փրկել համաձայնագիրը՝ Իրանին տրամադրելով 15 միլիարդ դոլարի վարկային գիծ և միջնորդելով հանդիպումը Թրամփի և Ռոհանիի միջև սեպտեմբերի 23-ին ՄԱԿ-ի Գլխավոր վեհաժողովի շրջանակում:

Առհասարակ, Թրամփը վերջին ժամանակներում նկատելիորեն զիջող, բանակցող կերպարում է, նա ցույց է տալիս, որ իր հետ կարելի է պայմանավորվել: Թերևս, այս իրավիճակում ամենապատեհ պահն էր Բոլթոնից ազատվելու նրա քայլը:

Նույնիսկ Չինաստանը գովեստով է արտահայտվել Միացյալ Նահանգների հետ միջուկային հարցերի շուրջ բանակցությունները շարունակելու մասին Հյուսիսային Կորեայի հայտարարությանը: Մալայզիայի արտգործնախարար Սայֆուդին Աբդուլահի հետ համատեղ ասուլիսում Չինաստանի արտգործնախարար Վանգ Յին Վաշինգտոնին կոչ է արել առավել կառուցողական արձագանքել Փհենյանից ստացվող ազդակներին:
«Մենք բարձր ենք գնահատում Միացյալ Նահանգների հետ միջուկային թեմայով երկխոսությունը շարունակելու Հյուսիսային Կորեայի արտահայտած պատրաստակամությունը: Մենք համոզված ենք, որ դա Փհենյանի կողմից կարևոր քայլ է, որը թույլ կտա առաջ տանել Կորեական թերակղզու խնդիրների քաղաքական լուծումը», - ասել է Չինաստանի արտաքին գերատեսչության ղեկավարը:

Նա հույս է հայտնել, որ մինչև այս ամսվա վերջ Հյուսիսային Կորեան և Միացյալ Նահանգները վերսկսեն բանակցությունները:

Միաժամանակ ԱՄՆ-ը և Չինաստանը փորձում են մեղմել տնտեսական վեճը: ԱՄՆ նախագահ Դոնալդ Թրամփը գովեստով է արձագանքել ամերիկյան հակաքաղցկեղային դեղամիջոցների և որոշ այլ ապրանքների ներկրման սակագները չբարձրացնելու Չինաստանի որոշմանը և, իր կողմից, հաղորդել է չինական արտադրանքի նկատմամբ միլիարդավոր դոլարների սակագների բարձրացումը միառժամանակ հետաձգելու մասին:
Թրամփը հայտնել է, որ սակագների բարձրացում չի լինի մինչև հոկտեմբերի 15-ը: Մինչ այդ երկու երկրները կփորձեն բանակցել և կարգավորել փոխադարձ առևտրի ոլորտում ի հայտ եկած սուր ճգնաժամը, որը տնտեսագետներն արդեն անվանում են «առևտրային պատերազմ»:

Մոլորակի ամենախոշոր այդ երկու տնտեսական հսկաների տարաձայնությունները, ներկրման սակագների փոխադարձ բարձրացումը վնաս են հասցնում ամբողջ աշխարհի տնտեսությանը: Ենթադրվում է, որ Չինաստանի փոխվարչապետ Լյու Հին հոկտեմբերի սկզբին կմեկնի Վաշինգտոն, որտեղ կհանդիպի Թրամփի հետ:

Մետաքսյա Շալունց