Ռոբերտ Քոչարյանն ազատություն կստանա, եթե Նիկոլ Փաշինյանը դիմանա փորձությանը

ՀՀ երկրորդ նախագահ Ռոբերտ Քոչարյանի պաշտպանները միջնորդել են առաջին ատյանի դատարան՝ Սահմանադրական դատարանի սեպտեմբերի 4–ի որոշման հիմքով Ռոբերտ Քոչարյանի նկատմամբ քրեական հետապնդումը անհապաղ դադարեցնել և Քոչարյանի նկատմամբ ընտրված խափանման միջոցն անհապաղ վերացնել։

Երեւանի ընդհանուր իրավասության դատարանը, դատավոր Աննա Դանիբեկյանի նախագահությամբ, հեռացել է խորհրդակցական սենյակ` «Մարտի մեկի» գործով սահմանադրական կարգը տապալելու համար մեղադրվող ՀՀ երկրորդ նախագահ Ռոբերտ Քոչարյանին անհապաղ ազատ արձակելու միջնորդության վերաբերյալ որոշում կայացնելու։ Դատական ակտը կհրապարակվի սեպտեմբերի 17-ին` ժամը 13:00-ին։ Դատարանից դուրս իրադարձություները զարգացել են լարվածության մթնոլորտում: Քոչարյանի ազատության կողմնակիցների և հակառակը պնդողների միջև միջադեպեր են եղել, կան բերման ենթարկվածներ, որոնց թվում է նաև Ազգային համաձայնություն կուսակցության նախագահ Արամ Հարությունյանը:
Դատական նիստին ներկա են եղեկ նաև Սեյրան Օհանյանը, Արմեն Գևորգյանը, Յուրի Խաչատուրովը: Դատարանի դահլիճում ելույթ է ունեցել նաև նախագահ Ռոբերտ Քոչարյանը` պնդելով, որ իր դեմ հարուցված գործը քաղաքական էլեմենտներ ունի, այս ընթացքում խախտվել են իր իրավունքները. «Սա Հայաստանի Հանրապետության պատմության ամենից խայտառակ քրեական գործն է, և այս գործի մասին գրվելու է դասագրքերում։ Այս մեկ տարվա ընթացքում իմ իրավունքները խախտվել են բազմաթիվ անգամներ, և իմ տպավորությունն այնպիսին է, որ այս գործով որևէ խախտման հնարավորություն բաց չեն թողել։ Սա անձնավորված գործ է, քաղաքական հետապնդման էլեմենտ կա այստեղ, և սա արվում է մի մարդու նկատմամբ, որը և' Ղարաբաղում, և' Հայաստանում նախագահ է եղել>>,- հայտարարել է Քոչարյանը:

Ամենաուշագրավը, սակայն, մեղադրող կողմի` ՀՀ գլխավոր դատախազության միջնորդությունն է, որտեղ նշվում է, որ Ռոբերտ Քոչարյանի նկատմամբ առաջադրված մեղադրանքը պայմանավորված չէ նրա կարգավիճակով, ուստի որոշումը, որտեղ ամրագրված է կարգավիճակային անձեռնմխելիության իրավունքը, չի ենթադրում Քոչարայնի ազատ արձակումը: «Ռոբերտ Քոչարյանին առաջադրված մեղադրանքը չի առնչվում նրա գործառութային անձեռնմխելիությանը, այսինքն նրան մեղսագրվող արարքները չեն կարող դիտվել որպես նախագահի կարգավիճակից բխող, հետևաբար ՍԴ որոշման ուժով Քոչարյանին ազատ արձակելու հիմքեր առկա չեն»,– հայտարարել է Քոչարյանի և մյուսների գործով մեղադրող, Երևան քաղաքի դատախազ Գևորգ Բաղդասարյանը:

Ավելի աբսուրդային հիմնավորում թերևս դժվար էր պատկերացնել: Այդ ով չգիտի, որ Ռոբերտ Քոչարյանը Մարտի 1-ի իրադարձությունների ժամանակ գործել է որպես նախագահ, այդ թվում արտակարգ ռեժիմ է մտցրել: Ի վերջո, եթե Քոչարյանը նախագահ չլիներ, հազիվ թե այսօր կրեր կատարվածի պատասխանատվությունը: Թերևս հասկանալու հետ կապված շատ լուրջ խնդիրներ պետք է ունենալ` պնդելու համար, որ Քոչարյանը Մարտի 1-ի գործում ներգրավված է ոչ որպես նախկին նախագահ: Եթե ոչ որպես նախկին նախագահ, ապա որպես ով է այսօր դատվում նա: Իսկ նախկին նախագահը արդեն իսկ կարգավիճակ է, որն ամրագրված է ՍԴ որոշմամբ: Դատախազի նման անհեթեթ միջնորդությունը փաստում է, որ Նիկոլ Փաշինյանի իշխանության համար դատավորներին և դատախազներին չզանգելը ծանր փորձաքար է: Եթե Փաշինյանին հաջողվի դիմանալ այս դժվար փորձությանը, ապա Ռոբերտ Քոչարյանը սեպտեմբերի 17-ին ազատ արձակվի:

Հայկ Դավթյան