Հեղափոխության ծնած ձրիակերը

slaq.am- ը գրում է. Սահմանադրական դատարանի դատավոր Վահե Գրիգորյանը, որը երեք անգամ փորձելուց հետո այս տարվա հունիսի 18-ին վերջապես ընտրվեց դատավոր, փաստացի աշխատանքի չի գնում: Մամուլում արդեն հրապարակումներ են եղել, որ Վահե Գրիգորյանը չի մասնակցում ՍԴ աշխատանքային և դատական նիստերին, իրեն մակագրված գործերով որևէ աշխատանք չի կատարում, եզրակացություններ չի ներկայացնում: Փաստացի Վահե Գրիգորյանը ՍԴ դատավորի իր պարտականությունները չի կատարում:
Մենք ՍԴ աշխատակազմի ղեկավար Է. Ղազարյանից հետաքրքրվեցինք, թե արդյոք ՍԴ դատավորի ծառայողական պարտականությունները չկատարող Վահե Գրգորյանը չի՞ օգտվում դատավորի համար նախատեսված ծառայողական ավտոմեքենայից, հեռախոսից, սոցիալական երաշխիքներից և մնացած արտոնություններից: Աշխատակազմի ղեկավարը մեզ պատասխանեց, որ Վահե Գրիգորյանն օգտվում է ՍԴ դատավորի համար նախատեսված բոլոր արտոնություններից ու հնրավորություններից:
Հարց է առաջանում, թե ինչու է պետությունը բարձր` շուրջ 700 հազար դրամ աշխատավարձ վճարում և հավելյալ այլ միջոցներ հատկացնում փաստացի չաշխատող դատավորին: Սա կոնկրետ պետական միջոցների անհարկի վատնում է:
Ուշագրավ է, որ վերջին մեկ տարում տարատեսակ մանր պաշտոնյաներ`սկսած դպրոցի տնօրեններից, վերջացրած գյուղապետերով, մեղադրվում էին այս կամ այն աշխատողին գրանցելու և աշխատավարձ դուրս գրելու համար: Ուրիշներին դա չի կարելի, բայց Վահե Գրիգորյանին կարելի է, որովհետև նա հեղափոխության ծնած ձրիակերն է: