Ընտրախախտման դեպքում՝ միայն ազատազրկում
ՀՀ կառավարության այսօրվա նիստի ընթացքում հաստատվեց ԱԺ պատգամավոր Էդմոն Մարուքյանի կողմից օրենսդրական նախաձեռնության կարգով ներկայացված՝ Քրեական օրենսգրքում փոփոխություն կատարելու մասին օրենքի նախագծի վերաբերյալ եզրակացությունը: ՀՀ արդարադատության նախարար Արփինե Հովհաննիսյանն ասաց, որ նախագծով առաջարկվում է Քրեական օրենսգրքի 153-րդ հոդվածով մեկից ավելի անգամ կամ այլ անձի փոխարեն քվեարկելու համար նախատեսված պատժից հանել տուգանքը՝ որպես պատժատեսակ, և թողնել միայն ազատազրկման ձևով պատիժը: Նրա համոզմամբ՝ հարցը երկու ենթատեքստ ունի՝ ինչպես՝ իրավական, այնպես էլ՝ քաղաքական: Ներկայացնելով իրավական տեսանկյունը՝ Արփինե Հովհաննիսյանն ասաց, որ Քրեական օրենսգրքի այդ հոդվածը Քրեական օրենսգրքի տրամաբանությանը համահունչ նախատեսում է պատժի անհատականացման սկզբունքին համապատասխան պատիժների հնարավոր այլընտրանքային եղանակներ: Արփինե Հովհաննիսյանն ասաց, որ ուսումնասիրվել է նաև միջազգային փորձը, ինչը ցույց է տալիս, որ նմանատիպ հանցակազմերի համար սկզբունքորեն միշտ տուգանքը նախատեսված է՝ որպես այլընտրանքային պատժատեսակ: Հարցի վերաբերյալ իր կարծիքը հայտնեց էկոնոմիկայի նախարար Արծվիկ Մինասյանը և նշեց, որ կարծում է, թե կամ պետք է տուգանքի չափը խստացնել, կամ ստեղծել այնպիսի մեխանիզմներ, որոնք կբացառեն ընտրախախտումները: Կառավարության աշխատակազմի ղեկավար-նախարար Դավիթ Հարությունյանը դեմ արտահայտվեց պատգամավորի առաջարկին: Նա օրինակ բերեց, որ եթե ամուսինը կնոջ անձնագրով գալիս է մասնակցելու ընտրության, դա չի կարելի քրեական պատասխանատվության հիմք համարել: Ըստ նրա՝ դատարանը պետք է որոշի՝ արարքը քրեորեն պատժելի՞ է, թե ոչ: Վարչապետ Հովիկ Աբրահամյանը նշեց, որ մասնագետներն իրեն հայտնել են, որ Գերմանիայում և Շվեյցարիայում ընտրախախտումը պատժվում է բացառապես քրեական եղանակով.«Քանի, որ մենք մեր առջև, իշխանություններս խնդիր ենք դրել, որ բարձրացնենք ընտրությունների վերաբերյալ վստահությունը, համաձայնություն ենք տալիս, թող Ազգային ժողովը որոշի»: Ա.Ավագյան
Հետևեք մեզ Viber-ում
