«Ինտեր ՌԱՕ»-ն կհեռանա նաեւ Վրաստանից

  Ռուսական «Ինտեր ՌԱՕ» ընկերությունը կարող է վաճառել իր ակտիվները Վրաստանում, մասնավորապես` Թբիլիսյան ջերմաէլեկտրակայանի 9-րդ եւ 10-րդ բլոկները, որոնք մտնում են «Մթկվարի Էներգետիկա» ընկերության մեջ (պատկանում է «Ինտեր ՌԱՕ»-ին): Այս մասին հայտնում է ТАСС-ը` հղումով «Մթկվարի Էներգետիկային» մոտ կանգնած իր աղբյուրին: ««Մթկվարի Էներգետիկայի» վաճառքի գործարքը չի բացառվում»,- մասնավորապես` հայտնել է գործակալության զրուցակիցը: Հենց «Ինտեր ՌԱՕ»-ից այս տեղեկատվությունը դեռեւս չեն մեկնաբանում: Վրացական մամուլի տեղեկություններով` «Մթկվարի Էներգետիկան» գնելու հարցում շահագրգռված է «Վրացական արդյունաբերական խումբը», որի հիմնադիրը երկրի նախկին պաշտպանության նախարար Գելա Բեժուաշվիլին է եւ նրա եղբայրը` խորհրդարանի պատգամավոր Դավիդ Բեժուաշվիլին: «Մթկվարի Էներգետիկային» է պատկանում Թբիլիսիից 40 կիլոմետր հեռավորությամբ գտնվող Մթկվարի ջերմաէլեկտրակայանը` բաղկացած երկու էներգաբլոկներից` յուրաքանչյուրը 300 մեգավատտ հզորությամբ: Սա Վրաստանի խոշորագույն ջերմաէլեկտրակայանն է: