Անխղճություն է գյուղացուց 100 դրամով կաթ գնելը. Դ. Լոքյան

Ես դեմ եմ, որ գյուղացուց 100 դրամով կաթ գնեն, դա անխղճություն է, բայց եթե 150-170 դրամի սահմաններում լինի՝ նորմալ է: Այս մասին Արագածոտնի մարզի Թաթուլ համայնքի բնակիչների հետ հանդիպման ժամանակ հայտարարեց ՀՀ տարածքային կառավարման և զարգացման նախարար Դավիթ Լոքյանն՝ անդրադառնալով գյուղացիների բարձրացրած այն խնդրին, որ իրենց խաբում են և իրենցից անհամեմատ էժան կաթ մթերում: «Սխալ է մտածել, որ կաթի գինը Հայստանում պետք է միշտ 200 դրամ լինի: Միջազգային շուկայում կաթն, ինչպես նավթը, ոսկին իր միջազգային գինն ունի՝ 0.26 ցենտ : Եթե կաթի գինը Հայաստանում ամբողջ տարին 200 դրամ լինի, Հայաստանում պանիր արտադրելն ու արտահանելը կդառնա ոչ մրցունակ, քանի որ դրսի պանիրն ավելի էժան է: Մարդիկ կգնան Բելառուսիայից կամ Վրաստանից պանիր կբերեն»,-ասաց նախարարը՝ նշելով, որ իրենք պետք է մտածեն շատ կաթ արտադրլու մասին: Թաթուլի բնակիչները հայտնեցին, որ գյուղում 400 ավելի կով կա, և կաթը պահելու համար երկու հատուկ սառնարանի անհրաժեշտություն կա: Նախարարը խոստացավ առաջիկայում օժանդակել, որպեսզի գյկուղին սառնարաններ տրամադրվեն, ինչից հետո եթե գյուղացի լինի, ով իրենց օգնությամբ կփորձի վերամշակման կետ հիմնելու, շատ լավ կլինի: «Ամբողջ գյուղով կարելի է վերամշակաման կետը կոոպերատիվ հիմնել»,-առաջարկեց նախարարը: