Երեք կարևոր սկզբունքները
«Քաղաքական օրակարգը պետք է բաց լինի: Կան հարցեր, որոնք հետաքրքրում են Նիկոլ Փաշինյանին, կան հարցեր, որոնք հետաքրքրում են նաև մեզ»,- ասաց ԱԺ ՀՀԿ-ական պատգամավոր Արմեն Աշոտյանը լրագրողների հետ զրույցում՝ անդրադառնալով Նիկոլ Փաշինյանի և ՀՀԿ խմբակցության ղեկավար Վահրամ Բաղդասարյանի պլանավորված հանդիպմանը: Ըստ նրա` այդ հանդիպումները երեք կարևոր սկզբունքների հիման վրա պետք է կազմակերպվեն: Առաջին՝ սահմանադրականություն, երկրորդ՝ ՀՀ ներքին կայունություն, երրորդ` Հայաստանի անվտանգային միջավայրի կայունություն: «Շատ կարևոր եմ համարում, որ քաղաքական ուժերն իրար հետ խոսեն ոչ միայն հանրային հարթակներում՝ օգտվելով մամուլից, «Ֆեյսբուք»-ից, այլ նաև անձամբ, դա շատ կարևոր է, որովհետև եթե մենք խոսում ենք բացառապես հրապարակային դաշտում, օրինակ` ես գրառում եմ կատարում «Ֆեյսբուք»-ում, վարչապետը կիրակի օրը լրագրողի հարցով այդ գրառմանը պատասխանում է, կարծում եմ` դա երկխոսության ձև է, բայց ոչ` ամենաարդյունավետը, որովհետև այս ձևի մեջ գերակայում են ավելի շատ քաղաքական շահերի, քան քաղաքական արժեքների դիրքերը»,- ասաց պատգամավորը:
Հետևեք մեզ Viber-ում
