«ԱԱԾ-ն Քոչարյանի ունեցվածքի վերաբերյալ ուսումնասիրություն է իրականացնում». Արթուր Վանեցյան

Ազգային անվտանգության ծառայությունն ուսումնասիրություն է իրականացնում ՀՀ երկրորդ նախագահ Ռոբերտ Քոչարյանի ունեցվածքի վերաբերյալ։ Այդ մասին կառավարության նիստից հետո՝ լրագրողների հետ ճեպազրույցում, ասել է ԱԱԾ տնօրեն Արթուր Վանեցյանը։ «Ուսումնասիրությունն իրականացվում է, առաջիկայում կհրապարակվի»,- նշել է Վանեցյանը, փոխանցում է «Ազատություն»-ը։ Սեպտեմբերի սկզբին՝ մամուլի ասուլիսի ժամանակ, Ազգային անվտանգության ծառայության տնօրենը՝ հակադարձելով Քոչարյանի՝ միլիարդներ չունենալու մասին հայտարարությանն, ասաց, որ Հայաստանի երկրորդ նախագահը «Կոնգրես» հյուրանոցը ձեռք է բերել 6 միլիոն դոլար կաշառքի դիմաց։ ԱԱԾ պետն ասաց՝ փաստերով կխոսի։ «Ռոբերտ Քոչարյանը հեռուստատեսությամբ հանդես է գալիս և ասում է՝ «մենք ոչ մի բան չունենք»։ Փաստերով կխոսենք և կհրապարակեմ ով ինչ ունի և ոնց է ձեռք բերել։ Ոնց է ձեռք բերել «Կոնգրես» հյուրանոցը 6 միլիոն դոլար կաշառք վերցնելու արդյունքում և մնացած այլ, այլ ունեցվածքները», - ասաց Վանեցյանն ու ցուցադրեց փաստաթղթեր՝ նշելով. «Շատ-շատ բաներ կան՝ Քոչարյանի ընտանիքին են պատկանում»։