Խոշոր ավտովթար Երևանում. բախվել են Opel-ն ու Mitsubishi-ն, վերջինն էլ բախվել է մայթին տեղադրված երկաթե արկղին. կան վիրավորներ. ՖՈՏՈՌԵՊՈՐՏԱԺ

16:05 - 27/սեպտեմբերի/2018

Այսօր՝ սեպտեմբերի 27-ին, խոշոր ավտովթար է տեղի ունեցել Երևանում։ Ժամը 14։10-ի սահմաններում Ռոստոմյան-Մուրացան փողոցների խաչմերուկում բախվել են Opel Astra մակնիշի 34 CR 391 համարանիշի և Mitsubishi Outlander մակնիշի 17 FT 177 համարանիշի ավտոմեքենաները։ Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով Opel-ի վարորդն ու նրա 2 ուղևորները տեղափոխվել են «Էրեբունի» բժշկական կենտրոն։ Դեպքի վայր են ժամանել ճանապարհային ոստիկանության 1-ին սպայական գումարտակի 1-ին դասակի ավագ տեսուչ Հրայր Ստեփանյանն ու տեսուչ Նարեկ Մովսիսյանը։ Օպերատիվորեն ժամանել է նաև «Սիլ Ինշուրանս» ապահովագրական ընկերության ներկայացուցիչը։ Վթարի մասին Երևանի ՃՈ օպերատիվ կառավարման կենտրոնի պատասխանատու հերթապահ Արսեն Կարապետյանը տեղեկությունը փոխանցել է ճանապարհային ոստիկանության ճանապարհատրանսպորտային պատահարների հետաքննության և վարչական վարույթի իրականացման բաժանմունք, որտեղից ժամանել է հերթապահ խումբը՝ ավագ հետաքննիչ Արտյոմ Բաբիկյանի գլխավորությամբ, ում կողմից փաստի առթիվ նյութեր են նախապատրաստվում։ Ոստիկանությունը պարզում է վարորդների և վիրավորների ինքնությունը։ Ըստ նախնական տեղեկությունների՝ վթարի մեղավորը եղել է Opel-ի վարորդը, ով շրջադարձ կատարելիս չի զիջել գլխավոր ճանապարհով անցնող Mitsubishi-ի վարորդին, ինչն էլ դարձել է վթարի պատճառ, և բախման հետևանքով էլ Mitsubish-ն դուրս է եկել երթևեկելի գոտուց, բախվել երկաթե արկղին ու հայտնվել հետիոտնի համար նախատեսված անցման վրա։ Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: Լուսանկարները՝ Գագիկ Շամշյանի