Նոր մանրամասներ «Սուրբ Գրիգոր Լուսավորիչ» հիվանդանոցում տեղի ունեցած պայթյունից
«Սուրբ Գրիգոր Լուսավորիչ» հիվանդանոցում թթվածնային բալոնի պայթյունը տեղի է ունեցել այսօր կեսօրին։ Ինչպես տեղում Sputnik Արմենիայի թղթակցին հայտնել է հիվանդանոցի տնօրենի ժամանակավոր պաշտոնակատար Արման Հովակիմյանը, պայթյունը տեղի է ունեցել հիվանդանոցին պատկանող տարածքում` թթվածնային կայանում, որտեղ, ըստ Հովակիմյանի, բալոնների լիցքավորում է իրականացվում։ Պայթյունից մահացածը, Հովակիմյանը խոսքով, երիտասարդ տեխնիկն է, ով լիցքավորում է բալոնները։ Նա նոր է աշխատանքի ընդունվել` նախկին աշխատակցի թոշակի անցնելուց հետո։ Մահացած աշխատակցի ինքնությունը ղեկավարը չի բացահայտել, հիվանդանոցի տարածքում հավաքված աշխատակիցները, սակայն, հայտնել են, որ նա 36 տարեկան էր, Վահրամ անունով։ Առողջապահության նախարարության տվյալներով`պայթյունի հետևանքով ևս մեկ անձ վիրավորվել է։ Նա նույնպես հիվանդանոցի թթվածնային կայանի աշխատակից է։ Այս պահին տուժողը բուժօգնություն է ստանում «Գրիգոր Լուսավորիչ» հիվանդանոցում։ Թթվածնային կայանը հիվանդանոցային մասնաշենքից ոչ այնքան հեռու է գտնվում։ Հիվանդանոցային այլ բաժանմունքներ պայթյունից չեն տուժել։ Տարածքում այս պահին աշխատում են ոստիկանության աշխատակիցներն ու դեպքի վայրում քննչական գործողություններ իրականացնող քննիչները։ Այս պահի դրությամբ այլ տուժածների մասին տեղեկություններ չկան։ armeniasputnik.am
Հետևեք մեզ Viber-ում
