Թվանկարչություն, ուռճացված մասնակցություն ընտրություններին չկա. Արմեն Մարտիրոսյան

Չեմ կարծում, թե Երևանի ավագանու արտահերթ ընտրություններին մասնակցության ցուցանիշը ցածր է, բնական վիճակի է ամեն ինչ բերված, մենք սովորել էինք ուռճացված թվերին: Այս մասին Tert.am-ի հետ զրույցում ասաց «Ժառանգություն» կուսակցության նախագահ, ավագանու ցուցակի 2-րդ համար զբաղեցնող Արմեն Մարտիրոսյանը: «Նախորդ ընտրությունների նման թվանկարչություն, գազելներով բերել, ադմինիստրատիվ ռեսուրսների կիրառում չկա , բերվել է բնական մասնակցության վիճակի: Կարծում եմ, որ մեր քաղաքացիները շատ լավ հնարավորություն ունեն իրենց ցանկացած քաղաքային իշխանությունը ձևավորելու»,- շեշտեց Արմեն Մարտիրոսյանը: Արմեն Մարտիրոսյանն ասաց՝ ընտրություններին փոփոխություններն ակնհայտ են, մարդկանց տեսողությունը միանգամից լավացել է, օգնողները պակասել են, մարդկանց շարժունակությունը բարձրացել է, առողջությունը բարելավել է: Արմեն Մարտիրոսյանն ասաց, որ առաջին ընտրությունն է, որ ընտրատեղամասերից վստահված անձից ահազանգեր գրեթե չեն ստանում, միայն որոշ տեխնիկական խնդիրներ են լինում, որոնք էական ազդեցություն չեն թողնում ընտրությունների ընթացքի և վերջնարդյունքի վրա: «Աննախադեպ ընտրություններ են, այսպիսին պիտի լինեն ընտրությունները, սա լավ նախադեպ կարող է լինել արտահերթ խորհրդարանական ընտրությունների համար»,- ասաց նա: Արմեն Մարտիրոսյանը նաև նշեց, որ կարծում է՝ քարոզարշավը կարճ էր , այլ խնդիրներ ևս եղել են: «Ցավոք սրտի, Երևան քաղաքի քաղաքական կառավարումից անցում կատարվեց դեպի ներպետական օրակարգեր, և դա ազդեցություն ունեցավ քաղաքացիների տրամադրությունների վրա»,- ասաց նա: