Ինչու է ընտրողների ակտիվությունը ցածր. հայտնում է Փաշինյանը

Վարչապետ Նիկոլ Փաշինյանը Փարիզից Նյու Յորք մեկնելուց առաջ Ֆեյսբուք սոցիալական ցանցի միջոցով առցանց հեռարձակմամբ երևանցիներին կոչ է արել ակտիվ մասնակցել Երևանի ավագանու ընտրություններին: «Ուրախ եմ, որ ընտրություններն անցնում են լավ տրամադրությամբ, ոչ մի միջադեպ չկա: Ես հույս ունեմ, որ մենք ունենալու ենք օրինակելի ընտրություններ: Կա մի այսպիսի վիճակագարություն, որ նախորդ տարի տեղի ունեցած Երևանի ավագանու ընտրությունների համեմատ ակտիվությունը շատ փոքր՝ 1-2 տոկոսով ավելի քիչ է: Դա թերևս բացատրվում է նրանով, որ այս ընտրություններին գազելներով, ավտոբուսներով ընտրողներին ընտրատեղամաս բերել չկա: Այս ընտրությունները բացառիկ են լինելու նրանով, որ բացառապես քաղաքացու որոշումից է կախված արդյունքը: Թե ինչ է լինելու ընտրությունների արդյունքում, դա միայն դուք գիտեք: Հետևաբար, կոչ եմ անում, գնացեք ընտրատեղամասեր և ակտիվ քվեարկեք, չի կարելի բաց թողնել այս պատմական հնարավորությունը: Ես համոզված եմ, որ ընդհանուր առմամբ քվեարկությունը և ձայների հաշվարկը կանցնի սիրո և համերաշխության մթնոլորտում, չնայած մեր իրավապահները ծառայություն են իրականացնում, չի կարող այլ տրամաբանություն գործել: Ես օդանավից իջնելով՝ առաջինը կշտապեմ ինտերնետ մտնել և տեսնել, թե ինչ է տեղի ունեցել Երևանում: Ամենակարևորը, որ օրինականության ու կարգի հետ կապված խախտումներ չլինեն, մնացածը ժողովուրդն ինչ կորոշի, մենք խոնարհ ենք»,- հայտարարել է նա: