Ինչպես և ինչու Վլադիմիր Պուտինը օգնեց իր Նիկոլին խուսափել Եվրամիության ճնշումից

«Հայելի» մամուլի ակումբի ուղիղ եթերում վերլուծաբան Հայկ Այվազյանի գնահատականների համաձայն՝ Վլադիմիր Պուտինի վերջին քայլերը ոչ այնքան Նիկոլ Փաշինյանին պատժելու, որքան նրան քաղաքական մանևրի հնարավորություն տալու նպատակ ունեն։ Ռուսաստանից եկող ճնշումը Փաշինյանը կարող է օգտագործել որպես հակափաստարկ Արևմուտքի առաջ։

Այվազյանի խոսքով՝ Փաշինյանը կարող է Եվրամիությանը և արևմտյան գործընկերներին ասել, որ Մոսկվան իրեն ևս «պատին է դեմ տվել», ուստի ինքը չի կարող միանգամից կատարել բոլոր հակառուսական պահանջները։ Այդպիսով Պուտինը փաստացի Փաշինյանին ժամանակ շահելու հնարավորություն է տալիս։

Մոսկվան փորձում է թույլ չտալ, որպեսզի Փաշինյանը դառնա «երկրորդ Զելենսկի» և անցնի Ռուսաստանի բոլոր «կարմիր գծերը»։ Եթե Փաշինյանը չգնա այդ ճանապարհով, Ռուսաստանը շահագրգռված է նրան քաղաքական մանևրի դաշտ թողնել։

Վերլուծաբանի պնդմամբ՝ Ռուսաստանի այս դիրքորոշումը կարող է Փաշինյանին օգնել ոչ միայն Արևմուտքի, այլև Ադրբեջանի ու Թուրքիայի ճնշումների դիմաց։ Որքան քիչ լինի արևմտյան ճնշումը Երևանի նկատմամբ, այնքան սահմանափակ կարող է լինել նաև Բաքվի ու Անկարայի ճնշման հնարավորությունը։

Այսպիսով, Հայկ Այվազյանի հիմնական թեզն այն է, որ Պուտինի ճնշումը պարադոքսալ կերպով կարող է օգնություն դառնալ Փաշինյանի համար՝ նրան հնարավորություն տալով Արևմուտքի առաջ հիմնավորել հետքայլերը, ժամանակ ձգել և չգնալ Ռուսաստանի հետ վերջնական առճակատման։