Ընտանեկան կոնֆլիկտն ավարտվել էր մոր սպանությամբ

2023 թվականի մայիսի 6-ին Լճաշենում ընտանեկան կոնֆլիկտը վերածվել էր ընտանեկան ողբերգության. որդին սպանել էր մորը:

Դեպքի օրը անկողնային վիճակում գտնվող Կ. Խ.-ն որդուն հայտնել է, որ վերջինիս կինը՝ Ա. Մ.-ն, կարող է բնակարանը գրանցել իր անունով ու իրեն դուրս հանել տնից:

Այդ խոսակցությունից որդին բորբոքվել է ու 4-5 անգամ ձեռքերով հարվածել է մոր դեմքին՝ բերանի և քթի հատվածներին՝ պատճառելով բազմաթիվ վնասվածքներ, սալջարդեր, արյունազեղումներ ու քթոսկրերի կոտրվածքներ: Որդին այսքանով չի սահմանափակվել: Բարկությունն ամբողջությամբ թոթափելու համար երկու ձեռքով սեղմել է մոր պարանոցն ու խեղդամահ արել նրան:

Մեղադրյալը դատալսումների ընթացքում հրաժարվել է ցուցմունք տալուց, սակայն նախաքննության ընթացքում տված խոստովանական ցուցմունքներում մանրամասն նկարագրել է դեպքի ընթացքն ու հաստատել՝ մորն ինքն է խեղդել՝ մոտ 1 րոպե շարունակ սեղմելով նրա պարանոցը, մինչև որ նա անշարժացել է:

Որդին՝ Զ. Խ.-ն հայտնել է, որ զղջում է կատարած հրեշավոր արարքի համար: Կ. Խ.-ի դուստրը՝ Ա. Խ.-ն հայտնել է, որ եղբայրը երկար ժամանակ խնամել է անկողային վիճակում գտնվող մորը, օգնել նրան ամենօրյա կարիքներում:

Նրա խոսքով՝ մայրը 86 տարեկան էր, ուներ տեղաշարժման խնդիրներ, իսկ եղբայրը հոգեկան խնդիրներ չի ունեցել: Քույրը հայտնել է, որ եղբոր նկատմամբ բողոք չունի: Դատարանը մոր սպանության համար Զ. Խ.-ին ազատազրկել է 16 տարի ժամկետով: