Նստացույց կանեն․ նամակ վարչապետին
Արցախում հուղարկավորված զոհերի հարազատների բողոքի ակցիան կառավարության մոտ շարունակվում է․նրանք պահանջում են արտաշիրիմում իրականացնել և իրենց հարազատների մարմինները Հայաստան բերել։
«Հայաստան գալու առաջին իսկ օրվանից զբաղվել ենք այս խնդրով, բոլոր գերատեսչություններին դիմել ենք՝ Կարմիր խաչին, վարչապետին նամակներ ենք ուղարկել, աշխատակազմին ենք դիմել, այնտեղից մեզ ԱԳՆ են ուղարկել, նախարարությունից էլ ասել են՝ մեր տիրույթում չի հարցը»։ Այս մասին այսօր՝ հունվարի 22-ին, կառավարության մոտ տեղի ունեցող բողոքի ակցիայի ժամանակ լրագրողներին ասաց զոհված զինծառայող Սասուն Ավանեսյանի քույրը ՝ Բելլա Գալստյանը։
Ակցիայի մասնակիցների խոսքով՝ վարչապետ Նիկոլ Փաշինյանին հասցեագրված նամակները վերահասցեագրվում են Ազգային անվտանգության ծառայությանը, սակայն ԱԱԾ ղեկավարության հետ հանդիպում կազմակերպել չի հաջողվում։ Բելլա Գալստյանը նշել է, որ նախկինում հնարավոր էր հանդիպել ԱԱԾ նախկին ղեկավարի հետ, ով տեղեկացրել էր, թե հարցը գտնվում է ուշադրության կենտրոնում, մինչդեռ ներկայումս նորանշանակ ղեկավարի հետ հանդիպման հնարավորություն չեն ստանում։
Բողոքի ակցիայի ընթացքում մասնակիցները հերթական նամակն են հանձնել վարչապետի աշխատակազմին՝ պահանջելով հանդիպում կառավարության ղեկավարի հետ։ Նրանք նաև զգուշացրել են, որ եթե այս անգամ էլ չստանան հստակ պատասխան, ապա հաջորդ շաբաթ նախատեսում են նստացույց իրականացնել կառավարության շենքի մոտ։
Հետևեք մեզ Viber-ում
