Վեհափառի եղբոր եւ եղբորորդու գործով նորություն կա

Վերաքննիչ քրեական դատարանը մերժել է  Ամենայն հայոց կաթողիկոս Գարեգին Բ-ի եղբոր՝ Գևորգ Ներսիսյանի եւ վերջինիս որդու ՝ Համբարձում Ներսիսյանի պաշտպանների բողոքը՝ կալանավորման դեմ։ Այս մասին «Հրապարակ»-ին ասաց նրանց պաշտպան Էմին Խաչատրյանը։ Վերջինս նշեց, որ ավելի վաղ դատարանը Գևորգ Ներսիսյանի կալանքը երկարաձգել էր 2 ամսով, իսկ Համբարձում Ներսիսյանի կալանքը՝ 3 ամսով:

Հիշեցնենք` Ամենայն հայոց կաթողիկոսի եղբայրը` Գևորգ Ներսիսյանն ու նրա որդին` Համբարձում Ներսիսյանը, ձերբակալվեցին 2025 թվականի նոյեմբերի 2-ին: Նրանց մեղադրում են խուլիգանության և քարոզչությունը խոչընդոտելու մեջ։ Ըստ փաստաբան Արա Զոհրաբյանի` Համբարձում Ներսիսյանը նոյեմբերի 1-ին` ժամը 14:40-ի սահմաններում, կանգնած է եղել իր տան դարպասի դիմաց, նրան մի մարդ է մոտեցել և առաջարկել է մասնակցել «Հանրապետություն» կուսակցության` ժամը 16:00-ի հանդիպմանը: Համբարձում Ներսիսյանը հրաժարվել է, այդ մարդը փորձել է համոզել, խոսել են, այնուհետև մոտեցել է Համբարձումի հայրը՝ Գևորգ Ներսիսյանը, երեքով խոսել են և խաղաղ բաժանվել:
Կաթողիկոսի եղբայրն ու եղբորորդին կալանավորված են նոյեմբերի 3-ից։

Աննա Պապիկյան

«Հրապարակ օրաթերթ»