Արշակ սրբազանի միակ մեղքը
Արշակ սրբազանի կալանավորումը սպասելի էր: «Հրապարակի» հետ զրույցում ասաց Արագածոտնի թեմից Բյուրականի Սուրբ Հովհաննես եկեղեցու հոգևոր հովիվ Տեր Վրթանես քահանա Բաղալյանը:
«Իրենց սցենարն այդպիսին է․ թեմերում, եթե ձերբակալում են առաջնորդին, հաշվապահին, դիվանապետին, օրինակ, մեր թեմում այդպես է, այսինքն Մկրտիչ Սրբազանին, տիկին Նաիրային` տնային կալանք, Գարեգինը դիվանապետն է, նույն սցենարով Մայր Աոթռի ուղղությամբ են գնում, այսինքն, ձերբակալում են դիվանապետին: Դա իրենց սցենարի ձևն է, նույնիսկ պատճառները էական չեն, իրենք կարող են ցանկացած մարդու կալանավորել, հետո մտածել, թե ինչ հոդվածով են դատում, հոդվածն էլ այնպիսին լինի, որ հասարակության մեջ հակառակ տրամադրություններ ստեղծվի եկեղեցու նկատմամբ»,-ասաց տեր Վրթանեսը:
Հոգևորականը շեշտում է՝ հասարակության մոտ վատ տպավորություն առաջացնող որևէ հոդվածով գործ կկարեն:
«Տեսանք տեսանյութի պատմությունը․ հո քննչականից չէին ասելու, մենք ենք սարքել՝ լավ ենք արել: Այդ տեսանյութն առավոտյան հրաարակում են՝ երեկոյան պատասխանը տալիս են, իսկ տեր Վրթանեսի կնոջ, երեխաների հեռախոսները կամ տան համակարգիչները արդեն կլինի երկու ամիս, դեռ չեն ուսումնասիրել, միջի պարունակությունը չեն ուսումնասիրել ու չեն վերադարձրել, այսինքն, անժամանակ վերցնում են ու սրանով անհավասար պայմաններ են ստեղծում մեր և այն տիրադավների ու կարագալույծների միջև: Կարգալույծ մեկին, որը լուրջ խնդիրներով դուրս է եկել եկեղեցուց, կբերեն կրոնի, ազգային փոքրամասնությունների վարչության պետի պաշտոնում կնշանակեն, այն մյուս կարգալույծին աջակցություն ցույց կտան պետական հովանավորչության, իսկ երբ հերթը հասնում է նորմալ, կարգի մեջ եկեղեցականներին՝ խնդիրներ կստեղծեն իրենց համար»,- նկատում է հոգևորականը:
Այս իշխանություններն ամեն ինչ անում են դրսից եկող՝ Էրդողանից, Ալիևից ու Փաշազադեից եկող հրահանգները կատարեն, շեշտում է տեր Վրթանեսը:
«Քրեական հանցագործներին թողած՝ ընկել են իրենց քաղաքական հակառակորդների, եկեղեցականների հետևից: Ինձ այս ամեն ինչը 1937 թիվն է հիշեցնում, վերադարձել ենք ԿԳԲ-ի ժամանակները, երբ մարդու ջեբը դեղ էին գցում՝ այդ մակարդակի են: Եվ տեսնում ենք, որ մի հոգու հանձնարարական է կատարում մեր ողջ իրավապահ համակարգը»,-ասաց Տեր Վրթանեսը:
Հոգևորականը ենթադրում է, որ հրահանգներ իջեցնողը վերջին շրջանում երևի թե դեղերը չի խմել՝ մոտը սրացումներ են սկսվել:
Հարցին, թե ինչո՞ւ են թիրախավորել Արշակ Սրբազանին, ասաց.«Որովհետև Մայր Աթոռում դիվանապետն է, Մայր Աթոռ-թեմեր փոխհարաբերություններով ինքն է զբաղվում:Բնականաբար դրա համար ամեն գնով իր գլխին պիտի գործ սարքեին, վարկաբեկեին, օրենքը շրջանցելով: Ո՞ւմ համար է գաղտնիք, որ այդ ապօրինի գաղտնալսումը կամ տեսանյութ սարքելը հենց Նիկոլ Փաշինյանի հանձնարարականով է եղել, որևէ մեկի համար գաղտնիք չի: Իր վրա ապացուցելն անհնար կլինի, որովհետև ինքը ստախոս է: Ինքն էր չէ՞ առաջինը բարձրաձայնում, այսինքն, առաջինն իր մոտ էր այդ տեսանյութը, մինչև իրավապահներին հասնելը: Ուժային կառույցներն իր համար միջոց են կոմպրոմատներ ստեղծելու, որոնց միջոցով իր հին սովորույթի համաձայն՝ որպես թերուս լրագրող, մարդկանց շանտաժ անելու, ահաբեկելու և այդ ամեն ինչը օգտագործելով իր աթոռը պահելու և վերարտադրվելու համար: Արշակ սրբազանի միակ մեղքն այն է, որ ինքը Մայր Աթոռի դիվանապետն է ու իր ուխտին հավատարիմ է, ուխտադրուժ չի»,- ասաց Տեր Հայրը:
Վեհափառը ոչ մի բանից չի ընկճվի, չի կոտրվի, նա նման ճնշումներին սովոր է, կդիմանա՝ վստահ է հոգևորականը: Նա նշում է, որ ամենայն հավանականությամբ եպիսկոպոսաց ժողովին ընդառաջ, երբ եպիսկոպոսների մեծ մասն իրենց հավատարմությունն են հայտնել վեհափառին, հենց այդ հանգամանքն է ստիպել այս իշխանություններին շտապել Արշակ սրբազանի կալանավորման հարցում:
«Եպիսկոպոսաց ժողովից հետո տիրադավների որոշ մասը կզրկվեն իրենց եկեղեցական իշխանությունից, երևի հենց դա էլ շտապեցրել է նրանց»,-եզրափակեց տեր Վրթանեսը:
«Հրապարակ օրաթերթ»
Հետևեք մեզ Viber-ում
