Ինչքան էլ ձեզ համար տհաճ լինի, ընտրությունների արդյունքները բավականին կանխատեսելի էին․ Օհանյան

Ինչքան էլ ձեզ համար տհաճ լինի, այսօրվա ընտրությունների արդյունքները բավականին կանխատեսելի էին: Եվ պետք չի դրանից ողբերգություն սարքել, բայց հարկավոր է քննարկել, հասկանալ պատճառներն ու անպայման վերլուծել համապետական ընտրությունների հետ նմանությունները և տարբերությունները, որ ընդդիմությունը պարզի իր թույլ տեղերն ու անելիքները` մինչև 26-ի ընտրություններ:
Գիտեմ, որ վաղը շատ խելոք վերլուծություններ կարվեն և լիքը մարդիկ կգրեն այս բոլորի մասին շատ մանրամասն, իսկ հիմա, ինչպես ասում են` ոտի վրա ուղղակի մի քանի դիտարկում.
1. Եթե նույնիսկ միանգամայն ատելի ու մերժելի իշխանություն է, որից մարդիկ երազում են ազատվել, «ընդդեմի» քվեարկություն տեղի չի ունենում, քանի դեռ չկան այնպիսի թեկնածուներ, ում օգտին մարդիկ կուզենան քվեարկել, ում կերպարը կոգեշնչի և ում օգտին հաճույքով կքվեարկեն: Ուրեմն թեկնածուների անձն ու թեկնածու կուսակցությունների ցանկը շատ կարևոր է:
2. Միայն իրենց ճանաչելիության հարց լուծող, դատարկ ամբիցիաներ ունեցող մարդիկ ու կուսակցությունները, որոնք շանս չունեն անցողիկ շեմը հաղթահարելու, շատ վատ դեր են խաղում` առաջադրվելով և ձայներ փոշիացնելով: 26-ի ընտրություններին նրանց պետք է ամեն գնով հետ պահել դրանից: Նրանք պետք է հասկանան, որ դրանով բացառապես իշխանությանն են աջակցում:
3. Եվ ընդդիմությունը վերջապես պետք է հասկանա, որ Ժողովրդին ոչ թե պետք է մեղադրել, այլ նրա հետ խոսել, շփվել, աշխատել: Ձեր բոլոր անհաջողությունները գալիս են ժողովրդին թերագնահատելու, արհամարհելու, նրա հետ հաշվի չնստելու ճակատագրական սխալից: Կաբինետներից դուրս եկեք, գնացեք մարզեր: Քիչ ժամանակ ծախսեք դատարկ կուսակցական քննարկումների, ուտել- խմելու, բամբասելու, ինտրիգներ հյուսելու, իրար դեմ աշխատելու վրա...շատ շարժվեք ու շատ աշխատեք, պոզիտիվ ազդակներ փոխանցեք հանրությանը և անպայման արդյունք կլինի:

Այս մասին գրել է Հրապարակ օրաթերթի խմբագիր Արմինե Օհանյանը