Սամվել Կարապետյանի տանը խուզարկությունների օրը թաղամասից առգրավված 50 մեքենաները դեռևս չեն վերադարձվել սեփականատերերին

«Գործարար Սամվել Կարապետյանի տանն իրականացված խուզարկությունների օրը թաղամասից առգրավված 50 մեքենաները շուրջ մեկ ամիս է՝ իրավապահները չեն վերադարձնում իրենց սեփականատերերին»։ Այս մասին այսօր՝ հուլիսի 14-ին, NEWS.am–ի հետ զրույցում ասաց փաստաբան Տիգրան Հայրապետյանը։

«Իմ ունեցած տեղեկություններով, բոլոր 50 մեքենաները խուզարկվել են. այսինքն իրավապահները դիմել են դատարան, դատավորները թույլտվություն են տվել 50 մեքենաները խուզարկելու համար։ Խուզարկությունների արդյունքում որևէ բան չեն հայտնաբերել, բայց մեքենաները սեփականատերերին դեռևս չեն վերադարձրել։ Նշում են, որ խուզարկությունների ընթացքում փնտրում էին սահմանադրական կարգը բռնի տապալելու հետ կապված նյութեր»,–նշեց փաստաբանը։

Տիգրան Հայրապետյանը մեքենաների սեփականատերերին խորհուրդ է տալիս հանցագործության մասին հաղորդում ներկայացնել դատախազություն։

«Բայց քաղաքացիներն արդեն հույս չունեն, արդեն քրեական օրենքն ու դատարանը հեղինակություն չեն նրանց համար, որովհետև տեսնում են, որ որևէ բան չեն արել, բայց իրավապահները առգրավել են իրենց մեքենաները, որոնք Սամվել Կարապետյանի տնից 1 կիլոմետր հեռու են գտնվել»,–հավելեց Հայրապետյանը։

Փաստաբանը նշեց, որ մոտ 20 օր առաջ զրուցել է Սամվել Կարապետյանի գործով քննչական խմբի ղեկավարի հետ, վերջինս նշել է, որ առգրավված մեքենաները նախաձեռնված քրեական վարույթով չեն անցնում։

«10 օր անց հանդիպել եմ պարեկային ծառայության Երևան քաղաքի գնդի հրամանատարի հետ, նա պաշտոնապես ասաց, որ մեքենաները քրեական վարույթով են անցնում։ Կրկին զանգել եմ նույն քննիչին, ասել է՝ այո, Սամվել Կարապետյանի գործով են անցնում մեքենաները։ Այսինքն՝ մեկ հայտարարում են, որ այդ մեքենաները քրեական գործի հետ կապ չունեն, մեկ էլ հայտարարում են, որ ունեն»,–հավելեց Տիգրան Հայրապետյանը։