Ջալալ Հարությունյանի համար շտապօգնություն են կանչել

Վերաքննիչ քրեական դատարանում՝ նախագահությամբ Մխիթար Պապոյանի, այսօր՝ հունիսի 11–ի առավոտից ընթանում է 44-օրյա պատերազմում Ցորի Դ-20 դիվիզիոնի 20 զինծառայողների զոհվելու գործով դատական նիստը։

Այսօր դատարանը լսել է 5.5 տարի ազատազրկման դատապարտված Արցախի ՊԲ նախկին հրամանատար Ջալալ Հարությունյանին ու նրա պաշտպանին։

Ջալալ Հարությունյանի հետ դատարան եկած նրա հարազատներից մեկն ասաց՝ Հարությունյանը դժվարանում է պատասխանել հարցերին, 39 աստիճան ջերմություն ունի։

«Սպասեք, ժողովուրդ։ 17-18 տարեկան մի ա՞նձ է մեր դիմաց նստած, որ մենք հարց ենք տալիս, բարձր ջերմություն ունի, չի պատասխանում, դուք էլ հետևից օգնում եք։ Պաշտպանության բանակի հրամանատար է, պաշտպանական բանակ է իրեն վստահված եղել։ Ջերմություն ունե՞ք այս պահին»,- ասաց դատավոր Մխիթար Պապոյանը՝ դիմելով Ջալալա Հարությունյանին։

«Հնարավոր է»,-ասաց Հարությունյանը։

Շտապօգնության ծառայություն կանչեցին, որպեսզի Հարությունյանի ջերմությունը չափեն։

Քիչ անց դատական նիստը 20 րոպեով ընդմիջվեց ապա շարունակվեց Հարությունյանի մասնակցությամբ։