ՌԴ-ն պատրաստ է ԱՄՆ-ի հետ համագործակցության՝ իրավահավասարության և փոխշահավետության սկզբունքների վրա. Լավրով

Ռուսաստանը պատրաստ է իրավահավասարության և փոխադարձ շահավետության սկզբունքների վրա ԱՄՆ-ի հետ համատեղ նախագծերի իրականացմանը: Ինչպես տեղեկանում ենք «Ինտերֆաքս» գործակալությունից, այդ մասին հայտարարել է ՌԴ արտգործնախարար Սերգեյ Լավրովը։

«Եթե ամեն ինչ հավասար լինի, մենք պատրաստ ենք փոխշահավետ նախագծեր իրականացնել, հենց փոխշահավետ», – ասել է Լավրովը՝ հանդես գալով Ռուսաստանի արտաքին գործերի նախարարության Դիվանագիտական ​​ակադեմիայի հովանու ներքո անցկացված «Հարավռուսական պատմական հողեր։ Ազգային ինքնություն և ժողովուրդների ինքնորոշում» խորագրով բարձր մակարդակի խորհրդաժողովում։

Նախարարի խոսքով՝ սա «և՛ տիեզերքն է, և՛ բարձր տեխնոլոգիաները, անշուշտ նաև, էներգետիկան»։

«Մեզ մոտ աշխատել են ամերիկյան ընկերություններ։ Եվ այդ ամենը հնարավոր է, եթե ամերիկացի գործընկերները պատրաստ լինեն համաձայնության, և նրանք, իմ կարծիքով, պատրաստ են համաձայնեցնել այնպիսի սկզբունքներ, որոնք կապահովեն իրավահավասարությունն ու փոխշահավետությունը», – նշել է ՌԴ ԱԳ նախարարության ղեկավարը։

Բնութագրելով ԱՄՆ-ի հետ հարաբերությունների ներկայիս վիճակը՝ Լավրովն ասել է. «Վերադարձ կանոնավորությանը»։

ՌԴ ԱԳ նախարարը պատասխանել է նաև ռուս-ուկրաինական բանակցությունների երկրորդ փուլի անցկացման ժամկետների վերաբերյալ հարցին՝ նշելով, որ «ժամկետները դեռևս չեն որոշվել»։