Լևոն Քոչարյանի գործով «տուժող» ճանաչված ոստիկանը «տուժելու» մեծ փորձ ուներ. տարբեր գործերով ցուցմունք է տվել

Երևանի ընդհանուր իրավասության քրեական դատարանում՝ դատավոր Կարեն Ֆարխոյանի նախագահությամբ, այսօր կայացել է ԱԺ պատգամավոր Լևոն Քոչարյանի և Սերգեյ Ասատուրովի գործով դատական նիստը։

«Փաստինֆո»-ի հաղորդմամբ՝ դատարանում այսօր հարցաքննվել է որպես տուժող ճանաչված ոստիկան Վարդան Հովհաննիսյանը, որը ցուցմունքից պարզ դարձավ, որ վերջինս չի լսել և չի տեսել, որ ոստիկանները բերման ենթարկելուց առաջ օրինական պահանջ ներկայացնեին քաղաքացիներին՝ պահանջելով բացել փողոցը, քանի որ ինքը մոտեցել է Ամիրյան փողոց, երբ արդեն ոստիկանները բերման էին ենթարկում քաղաքացիներին, այդ ընթացքում չի տեսել, սակայն դատախազ Ա․ Դանիելյանի հարցապնդմանը՝ տեղեկություն ունի՞՝ արդյոք օրինական պահանջ եղել է, թե ոչ՝ ոստիկանը նշեց՝ տեղեկություն ունի։

«Պարոն Քոչարյանին բերում էին դեպի Գազելի մոտ, որ նստացնեն, բայց չի ստացվել, բերել են՝ մյուս մեքենայի մեջ նստացնել։ Պարոն Քոչարյանը «Գազելից» բռնվել էր, չէր ստացվում»,- ասաց ոստիկանը, ինչին ի պատասխան դատախազն ուղղորդող հարց հնչեցրեց՝ ճիշտ է հասկանում, որ Լևոն Քոչարյանը խոչընդոտում էր ոստիկանների գործունեությանը։ Պաշտպան Էրիկ Ալեքսանյանն առարկեց՝ նկատելով, որ հարցն ուղղորդող է, Քրեական դատավարության տրամաբանությամբ՝ մեղադրանքի կողմի ապացույցի հետազոտման ժամանակ ուղղորդում չի կարող լինել, ուղիղ հարցաքննություն է։ Պաշտպան Արամ Վարդևանյանն էլ ավելացրեց՝ հարցը ոչ միայն ուղղորդող էր, այլև՝ պատասխանը հստակ ձևակերպմամբ՝ «այո» կամ «ոչ» ակնկալող էր։ Լևոն Քոչարյանը հետաքրքրվեց ոստիկանից՝ երբ ինքն ասում էր, որ ոստիկաններն իրեն հարվածել են, ինքը և մյուս ոստիկաններն արդյո՞ք հարց ուղղել են՝ ով է հարվածել, ինչին ի պատասխան ոստիկանը նշեց՝ անձամբ ինքը չի հարցրել։ Լևոն Քոչարյանը նկատեց՝ ինչպես է ստացվում, որ բոլորն ասում են, որ իրեն չեն հարվածել, բայց ինքը վնասվածքներ է ստացել։

Հովհաննիսյանը հայտնեց, որ վերադասի հրահանգով է գնացել ՔԿ՝ հարցաքննության, թեև ինքը ծանուցումը չի տեսել, նշում է՝ չի վերցրել, բայց տեղեկացված է եղել, որ պետք է ՔԿ ներկայանա։ Լևոն Քոչարյանի գործով հարցաքննությունից բացի՝ այս ոստիկանը ևս երկու գործով է հարցաքննվել՝ վկայի կարգավիճակում։ Այլ գործերով, սակայն, ոստիկանը չի հարցաքննվել՝ վկայի ցուցումով։ Հարցին՝ արդյո՞ք Հրաչիկ Խաչատրյանը շրջվում է դեպի Լևոն Քոչարյանը՝ ոստիկանը նշեց, որ եղել է մի քանի անգամ, որ շրջվել է։ Հարցին՝ արդյո՞ք պատահական են միասին ծառայել Հովհաննիսյանը, Հրաչիկ Խաչատրյանը, Սուրեն Բաբայանը՝ ոստիկանը բացասական պատասխանեց։ Արամ Վարդևանյանը, սակայն, շարունակեց հարցը՝ նշելով, թե արդյո՞ք կոնկրետ խումբ է գումարտակում, ինչին ի պատասխան Հովհաննիսյանը նշեց, որ ծառայության բնույթից է կախված։ Վերադառնալով գազելի դրվագին, հարցին՝ ով էր քաշում Լևոն Քոչարյանին՝ գազելի մոտից՝ ոստիկանը չհիշեց։ Արամ Վարդևանյանը հետաքրքրվեց՝ արդյոք կաշկանդվածություն ունի, կարո՞ղ է Հայկազ Ջոմարդյանն էր՝ ոստիկանը նշեց, որ կաշկանդվածություն չունի, ինքն էլ հատուկ չի հետևել։

Հիշեցնենք, որ 2023թ․ սեպտեմբերի 22-ի ոստիկանության ծառայողները դաժան ծեծի ենթարկելով բերման են ենթարկել անհնազանդության ակցիաներին մասնակցող Լեւոն Քոչարյանին։ Վնասվածքների հետևանքով Լևոն Քոչարյանը տեղափոխվել էր հիվանդանոց։ Նույն օրը հայտնի դարձավ, որ Լ. Քոչարյանը ձերբակալվել է՝ ոստիկանության 4 ծառայողի՝ «բերետավորի», նկատմամբ իբրև բռնություն գործադրելու համար։ Վարույթն իրականացնող մարմինը մեղադրանք է ներկայացրել, ապա՝ կալանավորման միջնորդությամբ դիմել դատարան, որը բավարարվել է։ Լևոն Քոչարյանն ազատ է արձակվել կալանքից՝ ԱԺ պատգամավոր դառնալուց հետո։ Նախաքննության ավարտական փուլում Լևոն Քոչարյանի մեղադրանքը փոփոխվել է։ Մեղադրանք է ներկայացվել նաև Սերգեյ Ասատուրովին։