Հնդկաստանում մարդակեր գայլերը հոշոտել են ինը մարդու․ Դրանք ներխուժում են տներ, խժռում երեխաներին

Ասիական մարդակեր գայլերի ոհմակը գարնանից վախի մեջ է պահում Հնդկաստանի Ուտար Փրադեշ նահանգի բնակիչներին։ Հարձակումները սկսվել են մարտին, սակայն վերջին շաբաթներին իրավիճակն աղետալի ընթացք է ստացել։ Գայլերը հոշոտել են ինը մարդու, որոնցից յոթին՝ հուլիսի կեսերին։ Տուժած շրջան են ուղարկվել տարբեր շրջաններից գայլեր որսալու մասնագետներ։ Նրանց հաջողվել է վնասազերծել արդեն 4 գիշատչի, սակայն հարձակումները չեն դադարել։

Մարդակեր գայլերը գիշերները մտնում են գյուղեր և ծնողների «քթի տակից» գողանում երեխաներին

Բահրայչի շրջանում գայլերի հարձակման հետեւանքով առաջին մարդկային զոհերի մասին հայտնի է դարձել մարտին, այնուհետեւ երկար դադար է եղել: Գայլերը վերադարձել են հուլիսի 17-ին: Գիշերը ոհմակը մտել է Նավկա գյուղ և քարշ տվել երկու տարեկան աղջկան, որը բակում քնած էր մոր և հոր հետ, գրում Է Hindustan Times-ը: Գյուղացիները, նետվելով օգնության, նրան գտել են տնից 300 մետր հեռավորության վրա։ Գայլերը հասցրել են ուտել ոտքերը և մարմնի ստորին կեսը։

Նույն գիշերը ոհմակը քարշ է տվել և հոշոտել մեկ այլ գյուղում ապրող երեք տարեկան տղային։ Այնուհետև կորել է երկու տարեկան երեխա. նրա մարմինը դեռ չեն գտել։ Այդ ժամանակից ի վեր մահացու հարձակումները տեղի են ունեցել մի քանի օրը մեկ։

Զոհերի մեծ մասը երեխաներ են, բայց գայլերը հարձակվում են նաև մեծահասակների վրա: Ավելի քան 50 մարդ կարողացել է փրկվել, սակայն տարբեր վնասվածքներ ստացել։

Մարդիկ միավորվում են և զենքը ձեռքին պարեկում գյուղերը՝ հարազատներին գիշատիչներից պաշտպանելու համար։

Աղբյուր` Փաստինֆո