Հոգեկան հիվանդ մեկը կլինի. Կապանի համայնքապետն՝ իր ավտոմեքենան հրկիզելու դեպքի մասին
«Ենթադրում եմ, որ փորձել են հրկիզել ինձ սպասարկող ավտոմեքենան»,- այս մասին Oragir.News-ի հետ զրույցում ասաց Կապանի համայնքապետ Գևորգ Փարսյանն, անդրադառնալվ նախօրեին Կապանի մշակույթի պալատի մոտ տեղի ունեցած միջադեպին:
«Քանի որ Կապանի համայնքապետարանի շենքը հիմնանորոգվում է, մենք տեղափոխվել և մեր գործունեությունն իրականացնում ենք Կապանի մշակույթի պալատի շենքում: Ինձ սպասարկող ավտոմեքենան կայանված է եղել մշակույթի պալատի շենքի դիմաց։ Ինչ-որ մեկը փորձել է բենզինով այրել: Վնասը մեծ չէ, քանի որ մեր կապանցիները շուտ մարել են կրակը»,- ասաց Գևորգ Փարսյանը:
Հարցին՝ բնակիչները տվյալ արարքը կատարած անձին բռնե՞լ են, թե՞ ոչ, Կապանի համայնքապետը պատասխանեց, որ քաղաքացիները որևէ մեկին չեն նկատել: Ճշտող հարցին՝ իրավապահները մինչ այս պահը չե՞ն հայտնաբերել տվյալ անձին, Փարսյանը պատասխանեց.
«Իմ ունեցած տեղեկություններով՝ դեռ ոչ»:
Դուք կասկածներ ունե՞ք, թե ով կարող է նման բան արած լինի, արդյոք նախկնում նման դեպքեր եղե՞լ են, թե՞ ոչ, հարցրեցինք Կապանի համայնքապետին:
«Նման փորձեր նախկինում չեն եղել: Իմ կարծիքով՝ հոգեկան հիվանդ մեկը կլինի»:
Ավելի վաղ հայտնել էինք, որ մայիսի 21-ին Կապանում փորձել են այրել Կապան խոշորացված համայնքի ղեկավար Գևորգ Փարսյանին պատկանող Lexus LX 570 մակնիշի 055 QQ 55 համարանիշով ավտոմեքենան:
Հետևեք մեզ Viber-ում
