Ռուբեն Վարդանյանի «ձերբակալումը» իրավական փակուղու առջև է կանգնեցնելու ՀՀ իշխանությանը և դատական համակարգին․ Վահան Հովհաննիսյան
Ռուբեն Վարդանյանի «ձերբակալումը» իրավական փակուղու առջև է կանգնեցնելու ՀՀ իշխանությանը և դատական համակարգին։ Այս մասին «Փաստինֆո»-ի հետ զրույցում ասաց փաստաբան Վահան Հովհաննիսյանը։
Հիշեցնենք, որ սեպտեմբերի 27-ին Արցախից ՀՀ տեղափոխման ընթացքում ադրբեջանցիների կողմից Լաչինի միջանցքում տեղակայված ապօրինի անցակետից առեւանգվել է Արցախի նախկին պետնախարար Ռուբեն Վարդանյան ։ Նշվում է, որ նրան մեղադրանք է առաջադրվել ֆինանսական ահաբեկչության, զինված խմբավորումների ձեւավորմանը մասնակցելու եւ օտարերկրյա քաղաքացու կողմից Ադրբեջանի հանրապետություն ապօրինի մուտք գործելու համար։ Վարդանյանի նկատմամբ որպես խափանման միջոց է ընտրվել կալանավորումը՝ չորս ամիս ժամկետով։ Ռուբեն Վարդանյանի հարցով ՀՀ-ն արդեն դիմել է ՄԻԵԴ։
Հայ գործարար, բարերար և Արցախի նախկին պաշտոնյայի՝ ադրբեջանցիների կողմից «ձերբակալությունը», հարցի քաղաքական, բարոյական տեսանկյունից նաև իրավական խնդիր ունի։
Փաստաբան Վահան Հովհաննիսյանը «Փաստինֆո»-ի հետ զրույցում նշեց, որ ադրբեջանցիների կողմից Ռուբեն Վարդանյանի ձերբակալությունը իրավական փակուղու առջև է կանգնեցնելու ՀՀ իշխանությանը և դատական համակարգին։
«Բանն այն է, որ ՀՀ քրեական օրենսգրքի համաձայն՝ անձը կարող է ենթարկվել քրեական պատասխանատվության միայն ՀՀ տարածքում կատարած հանցանքի համար։ Մինչ այժմ գործող իրավական ակտերի և համաձայնագրերի ուժով ՀՀ իրավազորությունը տարածվում էր նաև Արցախի Հանրապետության և յոթ շրջանների վրա, ուստի այդ տարածքներում հանցանք կատարած անձանց նկատմամբ քրեական հետապնդում էր իրականացվում ՀՀ օրենսդրությամբ սահմանված կարգով։ Այդ տրամաբանությամբ առաջնորդվելու դեպքում, եթե անգամ ընդունենք, որ Ռուբեն Վարդանյանը հանցանք է կատարել Արցախի տարածքում, ապա ՀՀ-ն պարտավոր է նրան արտահանձնելու պահանջ ներկայացնել ադրբեջանի իշխանություններին և վերջինիս քրեական հետապնդման հարուցման հարցը լուծել ՀՀ օրենքներով սահմանված կարգով։ Եթե ՀՀ-ն չի ներկայացնում Ռ․Վարդանյանին արտահանձնելու պահանջ, ապա ընդունված է համարվում, որ նա՝ իրեն մեղսագրվող հանցանքը կատարել է Ադրբեջանի հանրապապետության տարածքում, ուստի ենթակա է քրեական հետապնդման այդ պետության օրենսդրությանը համաձայն»,- նշեց Վահան Հովհաննիսյանը՝արձանագրելով, որ այս դեպքում ՀՀ դատական համակարգը հայտնվելու է փակուղում։
Փաստաբանի պարզաբանմամբ՝ ՀՀ դատարաններում քննվում են 44-օրյա պատերազմի վերաբերյալ բազմաթիվ քրեական վարույթներ և եթե ՀՀ-ն Արցախում կատարված ենթադրյալ հանցանքի համար չի պահանջում արտահանձնել Ռ․Վարդանյանին, կամ ցանկացած այլ անձի, ապա չի կարող ՀՀ օրեսնսդրությամբ սահմանված կարգով իրավական գործընթացներ իրականացնել նաև 44-օրյա պատերազմի ընթացքում Արցախում և հարակից տարածքներում ենթադրյալ հանցանքներ կատարած անձանց նկատմամբ։
«Փակուղուց դուրս գալու երկու ճանաարհ կա․ կա՛մ Ռ․Վարդանյանին արտահանձնելու պահանջ, կա՛մ ՀՀ դատարաններում քննվող բոլոր զինվորական հանցագործություններով գործերի կարճում»,- նշեց Հովհաննիսյանը։
Հեղինակ՝ Իզաբել Սահակյան