Փաշինյանի նախընտրական նվերն Էրդողանին
Բացի այն, որ Նիկոլ Փաշինյանը բացահայտ դավաճանական բնույթի հայտարարություններ է անում, այդպիսով ծառայություններ մատուցելով Ալիևին, բացի այն, որ իր թիմակիցները գործնականում լծված են բացահայտ դավաճանությունն արդարացնելուն, այսինքն՝ հանցակցությունն են ապահովում, նրանք նաև ուղղակիորեն սպասարկում են Էրդողանի նախընտրական քարոզարշավը:
Խնդրեմ, հիացեք: Թուրքիայի ԱԳ նախարար Չավուշօղլուն, որ, ինչպես հայտնի է, Նիկոլ Փաշինյանից, ինչպես իր ենթակայից կպահանջեր, պահանջում է «ուղղել սխալն» ու Երևանում քանդել «Նեմեսիսի» արձանը, նոր դրսևորում է ունեցել: Մասնավորապես, նախընտրական հանդիպումներից մեկի ժամանակ անդրադառնալով իրենց մրցակցի քննադատական հայտարարություններին՝ Չավուշօղլուն հայտարարել է. «Այսօր նույնիսկ Հայաստանի վարչապետ Նիկոլ Փաշինյանն է հայտարարում Ադրբեջանի տարածքային ամբողջականությունը ճանաչելու պատրաստականության մասին, ներառյալ՝ Ղարաբաղը... Թյուրքի ճանապարհն անցնում է Շուշայով, Ջեբրայիլով, որտեղ թափվել է շահիդների արյունը, անցնում է հինավուրց թյուրքական հողով՝ Զանգեզուրով»:
Այստեղ, իհարկե, կարելի էր մի երկու կոպիտ բան ասել բոլոր նիկոլապաշտների հասցեին, զորօրինակ՝ «կերա՞ք...», բայց անիմաստ է նրանց առհասարակ որևէ բան ասել: Նրանք հրաշալի գիտեն, որ իրենց առաջնորդ Փաշինյանը թուրքերի կողմից է, հետևաբար՝ իրենք էլ են թուրքերի կողմից ու Հայաստանի և հայության թշնամիների շարքում: Նիկոլ Փաշինյանն ու նիկոլականները, ինչպեսև թուրքերը ունեն նույն նպատակները:
Ինչպես տեսնում ենք, Նիկոլ Փաշինյանի դավաճանական հայտարարությունները Էրդողանը, իր քարոզիչների ու կողմնակիցների միջոցով, ծառայեցնում է նաև իր նախընտրական նպատակներին: Ըստ էության, Էրդողանը, նրա ներկայացուցիչ Չավուշօղլուն արդեն չեն էլ թաքցնում, որ Նիկոլն «իրենց մարդն» է, իրենց դրածոն ու գործնականում իրենք են «թավշյա հեղափոխության» շահառուները:
Ի վերջո, պատահական չէր, որ 2021-ի փետրվարին, երբ Հայաստանի ԶՈՒ Գլխավոր շտաբի պետն ու մի քանի տասնյակ գեներալներ պահանջեցին կառավարության հրաժարականը, Էրդողանն առաջինը ու կայծակնային արագությամբ հայտարարեց, թե իրենց համար անընդունելի է Հայաստանում ռազմական հեղաշրջման փորձը: Նույն բառամթերքով նաև Նիկոլ Փաշինյանը խոսեց:
Փաստը մնում է փաստ, որ թուրքական իշխանությունները Նիկոլ Փաշինյանի նման «տարածաշրջայնային գաձին» ատամներով էլ կպահեն ՀՀ վարչապետի աթոռին ու պահում են: Ձեզ թվում է, թե որտեղի՞ց են սրանց իշխանության պայմաններում միլիոնավոր ներդրումները: Կամ այդ ո՞ւմ էր պետք պատերազմից անմիջապես հետո, պատերազմում խայտառակ պարտության մատնված երկրի «եվրոբոնդեր» գնել՝ մի քանի հարյուր միլիոն եվրոյի չափով:
Հա, ու վաղը, մյուս օրը, երբ Հանրապետության հրապարակով անցնելիս լինեք, շատ չզարմանաք, եթե տեսնեք, որ աշտարակի վրա արդեն թուրքական դրոշն է տնկված:
Արմեն Հակոբյան
Հետևեք մեզ Telegram-ում