Վահան Կոստանյանը համակարգելու է Թուրքիայի ուղղությունը
«Հրապարակ» թերթը գրում է. «Մինչ հանրությունը երկու օր է քնննադատում է իշխանությանը` հերթական աղմկահարույց որոշման համար, այն է՝ Արտաքին գործերի նախարարի տեղակալի պաշտոնում դիվանագիտական կենսագրություն չունեցող Վահան Կոստանյանի նշանակման համար, ԱԳՆ մեր աղբյուրներից տեղեկացանք, որ արտաքին գերատեսչության կարեւոր վարչություններից մեկի՝ սահմանակից պետությունների վարչության՝ թերեւս ամենաառանցքային ուղղության համակարգումը նախարար Արարատ Միրզոյանը դրել է իր նախկին խորհրդական, այժմ 29-ամյա փոխնախարար Կոստանյանի վրա։
Խոսքը Թուրքիայում, Ադրբեջանում և այդ երկրների շուրջ տեղի ունեցող, ինչպես նաև ՀՀ շահերին ուղղակի առնչվող իրադարձությունների և զարգացումների ուսումնասիրության ու մշտադիտարկման մասին է եւ այս աշխատանքներն այլեւս համակարգելու է Վահան Կոստանյանը: Այդ վարչությունում են մշակվում և կազմվում տարաբնույթ տեղեկանքներ, վերլուծական նյութեր` նշված պետությունների հետ կապված: Այսինքն, Կոստանյանի վրա դրված է Թուրքիայի ուղղության սպասարկումը։
Ի դեպ, ԱԳՆ-ին մոտ կանգնած մեր աղբյուրների փոխանցմամբ՝ առաջիկայում դիվանագիտական աշխատանքի կանցնի նաեւ Միրզոյանի մյուս ընկերը՝ նախարարության մամուլի քարտուղար Վահան Հունանյանը, ում կփոխարինի Կոստանյանի հետ աշխատած կադրերից մեկը»:
Առավել մանրամասն՝ թերթի այսօրվա համարում
Հետևեք մեզ Telegram-ում