Միքայել Համբարձումյանն ԱԱԾ-ից կապ էր հաստատել ինձ հետ. պայմանավորվել ենք, որ հնարավոր չէ համակարգիչն առգրավել. Վ. Ռշտունի
«Չեմ կարող դրական մեկնաբանել այդ երևույթը, որովհետեւ տարիներ շարունակ միջազգային կազմակերպություններ պայքարել են, որ այդ համակարգը գործի: Այդ դեպքում դատարանի նախագահն ընդհանրապես որևէ գործոն չուներ: Այդ առումով նախագահի անձի գործոնի բացակայությունը, բնականաբար, դատավորների մոտ համոզմունք էր ձևավորում, որ այդ բողոքն օբյեկտիվորեն հայտնվել է իրեց վարույթում»,- Դատավորների ընդհանուր ժողովից առաջ լրագրողների հետ զրույցում նշեց Վերաքննիչ քրեական դատարանի դատավոր Վազգեն Ռշտունին՝ անդրադառնալով նրան, որ ԱԱԾ-ն արդեն մի քանի ամիս է ՝ տարել է քրեական գործերը մակագրող համակարգիչը:
«Սերվերի միջամտության հետ կապված խնդիրը էլի է եղել: Կոնկրետ Միքայել Համբարձումյանի կողմից, ով այդ ժամանակ աշխատում էր Ազգային անվտանգության ծառայությունում, տնօրեն էր թե տեղակալ, չեմ հիշում, կապ է հաստատել ինձ հետ՝ որպես դատարանի նախագահի: Մենք պայմանավորվել ենք, որ հնարավոր չէ սերվերն առգրավել, քանի որ կխափանվի Վերաքննիչ քրեական դատարանի գործունեությունը: Իրենք եկել են, տեղում ուսումնասիրել են համակարգը մի քանի օրում ու էլի գնացել են: Լուծումներ գտնվել են, հիմա էլ էր հնարավոր լուծում գտնել. կարելի էր փորձաքննությունից առաջ համակարգիչը փոխարինել մեկ այլ համակարգիչով, նոր առգրավել համակարգիչը», - ասաց դատավորը:
Իմ ունեցած տվյալներով այսօր, առանց էլեկտրոնային համակարգի, գործերի բաշխման համաչափությունը պահպանված չէ, նշեց Ռշտունին: