«Նիկոլ Փաշինյանը կանհետանա մինչև ընտրությունները». Միհրդատ Մադաթյան
«Ինքնաթիռի հետ կապված միջադեպը, որտեղ պարզվել է, որ գերիներ չկան, ինչը խոստացել են իշխանությունները, իմ կարծիքով, այս իշխանությունների ստանդարտ քաղաքականության դրսեւորումն է, որը նրանք կիրառում են արդեն մի քանի տարի է՝ ստի, ապատեղեկատվության, նույնիսկ «մուտիլովկաների» քաղաքականությունը», – «Փաստինֆո» - ի եթերում հայտարարել է հոգեբան Միհրդատ Մադաթյանը:
Ըստ նրա՝ նման մեթոդները մշտապես կիրառվում են ցանկացած հարցերում։ Նրանց համար չկա ոչ մի սուրբ բան։ «Հիշեք այն մանիպուլյացիաները, որոնց դիմել են այս իշխանությունները անցած տարվա ապրիլի 24-ին, որքան ցածր ու հակահայրենասիրական են նրանք իրենց պահել այդ օրը։ Նույն իրավիճակն է ինքնաթիռի հետ կապված։ Հայտարարում են, որ ինքնաթիռում գերիների նոր խմբաքանակ է գալիս, և դա հենց Փաշինյանի և Պուտինի հանդիպումից հետո։ Ընդ որում, Ադրբեջանի ԱԳՆ-ն պնդում է, որ հայ գերիներ չունեն, կան ահաբեկիչներ, որոնց նրանք չեն պատրաստվում հանձնել։ Եվ ահա ինքնաթիռը դատարկ է ժամանում, իսկ Ռ.Մուրադովը հայտարարում է, որ դրանում գերիներ չպետք է էլ լինեին։ Այսինքն՝ իշխանությունների հետապնդած նպատակը մեղքը Ռուսաստանի վրա բարդելն էր։ Դա Ռուսաստանի ուղղությամբ նպատակաուղղված ինտերվենցիաներից մեկն էր, որը սկսվել էր դեռ 2018-ից։ Ռուսաստանի Դաշնության նկատմամբ նրանց թշնամական վերաբերմունքը նորություն չէ։ Եվ այսօր, ես ավելի քան վստահ եմ, որ թեև ռևերանսներ են արվում դեպի Ռուսաստան, բայց գործելով կուլիսների հետևում, տակից՝ իշխանություններն ամեն կերպ փորձում են ժողովրդին տրամադրել այդ երկրի դեմ»։
Հարցին, թե հնարավոր է, որ ընտրություններից առաջ Ալիևը, ի աջակցություն Փաշինյանի, այնուամենայնիվ վերադարձնի մեր գերիներին, Մ. Մադաթյանը պատասխանել է. «Եվ Ալիևը, և Էրդողանը, որոնք Բաքվում շքերթի ժամանակ գովաբանում էին Էնվեր փաշային, սատարում են Փաշինյանին, դա արդեն փաստ է: Նրանք մեկ անգամ չէ, որ մտահոգություն են հայտնել, երբ Հայաստանում ընդդիմությունը ինչ-որ քիչ թե շատ կտրուկ քայլեր է արել։ Ես չեմ կարծում, որ նրանք պատրաստ են հանձնել մեր ռազմագերիներին, որովհետև կա նաև երրորդ կողմ՝ Ռուսաստանը, որը հարց կտա. եթե դուք հայտարարել եք, որ դա ահաբեկիչներ են, այլ ոչ թե ռազմագերիներ, ապա ինչու ընտրություններից առաջ նրանք հանկարծ դարձան ռազմագերիներ, և դուք սկսեցիք նրանց վերադարձնել։ Կարծում եմ, որ Ալիևը գերիներին չի վերադարձնի այն մարդուն, ով պարտվել է պատերազմը, որի վրա նա տառացիորեն ոտքերն էր սրբում՝ չստանալով պատասխան։
Ես չեմ կարծում, որ Փաշինյանի կառավարման ժամանակ մեր տղաները կվերադառնան գերությունից։ Ինձ համար շատ ցավալի է այդ մասին խոսել, բայց ես վստահ եմ դրանում։ Ալիևն անպայման կվերադարձնի գերիներին, բայց հաջորդ իշխանությունների օրոք»։
Դառնալով հունիսի 20 – ի հնարավոր ընտրություններին՝ զրուցակիցը անշնորհական գործ է որակել կանխատեսում անելը։ «Ես կարծում եմ, որ պետք է հետևել մեկ այլ հայեցակարգի. այսօր հայտարարում են, որ կլինեն, ուրեմն պետք է դրանից ելնելով շարժվել։ Վաղը կպարզվի, որ դա այդպես չէ՝ ստիպված ենք լինելու կտրուկ փոխել խաղի կանոնները։ Ես կցանկանայի, որ ընտրությունները կայանային։ Ես չեմ վախենում Փաշինյանից, և վստահ եմ, որ հաղթելու շանս չունի։
Իմ հաշվարկներով՝ Փաշինյանի ընտրազանգվածը 15 տոկոսից ոչ ավելի է։ Ինչ վերաբերում է վարչական ռեսուրսին, ապա ամենեւին էլ փաստ չէ, որ նա աշխատելու է Նիկոլի օգտին,քանի որ այն միշտ էլ հաղթողին է պատկանում։ Իսկ ընտրություններում թվեր նկարելն այնքան էլ հեշտ չէ, և Փաշինյանը չէ, որ հորինել է այդ համակարգը։ Ասեմ ավելին, ինձ թվում է, որ Նիկոլ Փաշինյանը կանհետանա մինչև ընտրությունները, ինչով շատ դժվարին դրության մեջ կդնի իր համախոհներին։ Նա գործարկել է մի մեքենա, որը շատ դժվար է կանգնեցնել: Կարծում եմ՝ սա էր նրա ծրագիրը»։