Շմայսը ողջունում է Հակոբ Արշակյանին
Երեւանյան սրճարաններից մեկում Նիկոլ Փաշինյանի թիմակիցը՝ բարձր տեխնոլոգիական արդյունաբերության նախարար Հակոբ Արշակյանը հարձակվել է լրագող Փայլակ Ֆահրադյանի վրա: Վերջինս համարձակվել է նախարարից հետաքրքրվել, թե ինչ է անում աշխատանքային ժամին սրճարանում: Նախարարի եւ լրագրողի միջեւ հարցուպատասխանը չի մարսվել առաջինի կողմից, նախարարը հարձակվել է լրագրողի վրա, նրան մարմնական վնասվածք պատճառել եւ վնասել համակարգիչը: Միջադեպի տեսագրությունը տարածվել է լրատվամիջոցներում, որտեղ երեւում է նախարարի անբռնազբոս հարձակումնը:
Միջադեպից անցել է մի քանի ժամ, սակայն Հակոբ Արշակյանը շարունակում է մնալ իր պաշտոնում եւ ոչ միայն, նա կատարվածի վերաբերյալ մեկնաբանություն չի տվել, իսկ Հայաստանը ժողովրդավարության բաստիոն ներկայացնող հեղափոխական քայլիսներից եւ ոչ մեկը ներողություն չի խնդրել լրագրողից իրենց գործընկերոջ լկտի պահվածքի համար:
Եւ սա այն իշխանությունն է, որը մեզ իբր փրկում էին Շմայսներից, Թոխմախներից, բոլոր նմանակերպներից:
Կատարվածի ողբերգությունն ու աբսուրդն այն է, որ Արցախը թուրքին հանձնած, ավելի քան հինգ հազար զոհ տված, երկիրը աղետի առջեւ կանգնացրած այս մարդիկ ոչ միայն կարողանում են ազատ ապրել ու շրջել Հայաստանի փողոցներով, աշխատանքային ժամերին սրճել ժամանցի կենտրոններում, այլեւ հարձակվել լրագրողների վրա, մարդկանց, ովքեր համարձակվել են հետաքրքրվել ՝ ինչ գործ ունի նախարարը աշխատանքային ժամին սրճարանում: Նիկոլ Փաշինյանի ու իր թիմի համար լրագրողներն այլեւս գլխացավանք են դարձել, առանց այն էլ թավշյա իշխանությունն անցած երեք տարիներին չի փայլել մամուլի ու լրագրողների նկատմամբ հանդուրժողականությամբ, ճիշտ հակառակը լրագրողներն ամենախոցելին դարձան հենց այս իշխանության կողմից, այն օրվանից, երբ Նիկոլ Փաշինյանը ԶԼՄ-ները եւս բաժանեց սեւերի եւ սպիտակների, իսկ հիմա՝ 44-օրյա պատերազմից հետո այս մարդկանց կապերը լրիվ կտրվել են, միգուցե նրանց նյարեդերն այլեւս տեղի են տալիս, չեն ուզում լսել այն սոսկալի իրականության մասին, որոնք իրենք են <<պարգեւել>>: Վերջին շրջանում լրագրողների նկատմամբ նման հիստերիկ եւ ագրեսիվ պահվածքով է հատկապես աչքի ընկնում Անդրանիկ Քոչարյանը, ով անամոթաբար գոռգոռում, <<հոսանքազրկում>> է լրագրողներին, մյուսներն էլ խտրական վերաբերմունք են դնում լրատվական դաշտի ներկայացուցիչների նկատմամբ եւ ընտրում՝ ում հարցազրույց տալ, ում ոչ: Փայլակ Ֆահրադյանի նկատմամբ կատարվածը իշխանության՝ լրագրողների նկատմամբ անհաշտ վերաբերմունքի թերեւս ամենացցուն դրսեւորումներից էր եւ սա ոչ միայն քաղաքական հետեւանք պետք է ունենա եւ նախարարը պաշտոնանկ արվի, այլեւ իրավական:
Անի Սահակյան