Որքան է կառավարական առանձնատների ջրի պարտքի ընդհանուր գումարը

Վարչապետ Նիկոլ Փաշինյանի խոսնակ Արման Եղոյանը Azatutyun.am-ի հետ զրույցում տեխնիկական վրիպակ է որակել 54 միլիոն դրամ թիվը, որը երեկ վարչապետը նշել էրորպես կառավարական առանձնատների ջրի պարտքի ընդհանուր գումար։ Եղոյանը նշել է, որ հանձնարարվել է ճշտել պարտքերի առկայությունը, դրանց չափը և ներկայացնել հստակ տվյալներ։ «Ուղղակի մի ճշգրտում անեմ կոնկրետ թվի հետ կապված՝ կոնկրետ նշված թիվը եղել է տեխնիկական վրիպակ, ինչ վերաբերում է պարտքերին, ապա՝ այո, հանձնարարվել է ճշտել պարտքերի առկայությունը, դրանց չափը և ներկայացնել հստակ տվյալներ։ Սա է եղել, իսկ այդ թիվն ուղղակի եղել է վրիպակ։ Պարտքերի չափը, կամ դրանց առկայությունն այս պահին ճշտվում է»։ Հարցին, թե դեռևս հստակ չէ՝ պարտքեր կուտակել են կառավարության նախկին անդամները, թե ոչ, նա ասել է. «Այս պահին այդ հարցը ճշգրտվում է: Ես հենց հիմա հայտարարությունն եմ ճշգրտում, հանձնարարվել է ճշտել առկայությունը, դրանց չափը և առկայության դեպքում վճարել»։ Ճշտող հարցին՝ կարող է ասել, որ վրիպակ է ոչ միայն այդ 54 միլիոնի պարտքն, այլև ընդհանրապես պարտքի առկայությունը, այդ ամենը դեռ պետք է ճշտվի, Արման Եղոյանը պատասխանել է. «Դա այս պահին գտնվում է ուսումնասիրման փուլում, այո, այո»։