Մանվել Գրիգորյանն ու ադրբեջանական քարոզչամեքենայի արձագանքը

Ադրբեջանական մամուլը ուշի-ուշով հետևում է հայաստանյան վերջին օրերի իրադարձություններին՝ կապված Մանվել Գրիգորյանի հետ: Հատկապես ադրբեջանական քարոզչամեքենայի հիմնական գործիք Haqqin.az-ն, անդրադառնալով ԱԱԾ աշխատակիցների կողմից և քրեական հեղինակություն Արթուր Ասատրյանի՝ Դոն Պիպոյի և ԱԺ պատգամավոր Մանվել Գրիգորյանի ձերբակալությանը, գրել է, որ Հայաստանում ձերբակալել են «ադրբեջանական հողերի գլխավոր զավթողին»: Առհասարակ, կարելի է հաճախ հանդիպել նշյալ կայքում Մանվել Գրիգորյանի վերաբերյալ բոլոր նյութերի վերնագրերում այդ ձևակերպումը՝ «ադրբեջանական հողերի գլխավոր զավթողը»: Օրինակ՝ անդրադառնալով Մանվել Գրիգորյանի և Դոն Պիպոյի ձերբակալության հիմքերին, ադրբեջանական Haqqin.az-ը հոդվածը եզրափակել է հետևյալ կերպ. «Հիշեցնենք, որ գեներալ Մանվել Գրիգորյանը հրամայեց հայկական բանակի 5-րդ բրիգադին գրավել Ջաբրայիլն ու Ֆիզուլին: Նա էր, որ գրավեց Ֆիզուլու շրջանը և աչքի էր ընկնում ադրբեջանցի գերիների նկատմամբ հատուկ անհանդուրժողականությամբ»: Ադրբեջանական մյուս լրատվամիջոցները նույնպես՝ APA լրատվական գործակալությունը, Minval.az-ը, Oxu.az-ը, Trend-ը, Day.az-ը լայնորեն լուսաբանել են Մանվել Գրիգորյանի ձերբակալության հրապարակումները՝ օգտվելով հայկական ռուսալեզու կայքերի հրապարակումներից, բայց հիմնականում տեղեկատվական բնույթի լուրեր հրապարակելով, բացառապես Haqqin.az-ի, որը Մանվել Գրիգորյանի ձերբակալության մասին լուրը հրապարակելիս վերնագրերում մշտապես շեշտում է Մավել Գրիգորյանին որպես՝ «ադրբեջանական հողերի հիմնական բռնազավթող»։ Ադրբեջանական ոչ այնքան հայտնի մամուլում կան ևս մի քանի հոդվածներ, որոնք էլ բնութագրում են Մանվել Գրիգորյանի «հրեշավոր» կերպարն այն առումով, որ նա սեփական «ժողովրդին թալանել», «զինվորի հասանելիքն իր գազաններին է կերակրել»՝ ձևակերպումներով: Ընդհանուր առմամբ՝ ադրբեջանական մամուլի արձագանքը միանգամայն սպասելի էր, նրանց առիթ է հարկավոր հայաստանյան իրադարձությունների վրա չարախնդալու և Լեռնային Ղարաբաղի «գրավումը» ցույց տալու այս, կամ այն՝ «հրեշ» մարդու վրա հղում անելով: Այնպես որ, Մանվել Գրիգորյանն այս առումով՝ ադրբեջանական քարոզչամեքենայի համար հիանալի առիթ էր: Մետաքսյա Շալունց