Ինչ ճանապարհ է անցել պահածոն ՊՆ պահեստից մինչև Մանվել Գրիգորյանի առանձնատուն
Զինվորին մատակարարվող պահածոյացված սնունդն արտադրվում է Պաշտպանության նախարարության հայտարարած մրցույթով։ Արտադրողները շուրջ 10 ընկերություններ են։ Այս մասին Sputnik Արմենիային հայտնեց ՀՀ ՊՆ մամուլի քարտուղար Արծրուն Հովհաննիսյանը։
«Մատակարարումները կատարվում են կենտրոնացված և ապակենտրոնացված սկզբունքով։ Հեռավոր զորամասերին ավելի մոտ գտնվող ընկերությունները ուղիղ մատակարարում են տվյալ զորամասերի պահեստ։ Մյուսները մատակարարում են ՊՆ-ին։ Նախարարությունն ընդունում է, տեխնիկական վիճակը ստուգում, պահեստավորում»,- Sputnik Արմենիայի հետ զրույցում մեկնաբանելով, թե ինչ ճանապարհով կարող էր զինվորի համար արտադրված պահածոն հայտնվել ԵԿՄ նախագահ Մանվել Գրիգորյանի պահեստում, ասաց Հովհաննիսյանը։
Նրա խոսքով` ՊՆ-ի պահեստից սննդի ցանկացած խմբաքանակ իրավունք ունի դուրս բերվել միայն Թիկունքի վարչության ու մատակարարման դեպարտամենտի որոշմամբ։
Իսկ կոնկրետ Երկրապահ կամավորականների միության մատակարարումները ՊՆ-ից, Արծրուն Հովհաննիսյանի խոսքով հետևյալ կերպ են արվել. «Գրավոր դիմել են կամ նախարարին, կամ ավելի բարձր օղակի։ Վերևից պաշտպանության նախարարին եղել է համապատասխան հանձնարարություն։ Նախարարը հատկացման հատուկ թույլտվություն է տվել։ Հրամանը գնացել է Գլխավոր շտաբ, Գլխավոր շտաբից` Թիկունքի վարչություն, Թիկունքի վարչությունը պահեստից ԵԿՄ-ին թույլ է տվել X քանակ ստանալ»։
Ինչ վերաբերում է հատկացված խմբաքանակի նպատակային օգտագործմանը, Հովհաննիսյանի խոսքով, օրենսդրությամբ ՊՆ-ին ԵԿՄ-ի նկատմամբ վերահսկողական իրավասություն տրված չէ։
Փոխարենը ԵԿՄ-ն օրենքով համարվում է ռազմականացված կառույց, որն իրավունք ունի իր բանակումներն իրականացնել պետության, տվյալ դեպքում` ՊՆ-ի հաշվին։
Ի դեպ, Մանվել Գրիգորյանի ներկայացրած պաշտոնական տվյալներով, ԵԿՄ-ն այսօր ավելի քան 60 000 անդամ ունի, որոնց շուրջ կեսն ամեն անգամ մասնակցում է պահեստազորի հավաքներին։
20 և ավելի տարիներ ԵԿՄ-ն ամեն տարի բանակումներ է իրականացնում և դրանց համար դիմում ՊՆ և ստանում անհրաժեշտ ամեն ինչ` վառելիք, սնունդ, վրաններ, քնապարկեր, հիգիենայի պարագաներ։
ԵԿՄ-ից զատ, նույն իրավունքից օգտվել են նաև այլ կազմակերպություններ, բայց ավելի փոքր չափով։ Ըստ որոշ տեղեկությունների` բանակի հաշվին են անցկացվել նաև Հայաստանի երիտասարդական հիմնադրամի կազմակերպած «Բազե» համահայկական երիտասարդական ամենամյա հավաքները:
Աղբյուրը՝ armeniasputnik.am
Հիշեցնենք, որ հունիսի 16-ին ՀՀ ԱԱԾ-ն ձերբակալեց ԱԺ պատգամավոր, գեներալ-լեյտենանտ Մանվել Գրիգորյանին, ապօրինի զենք-զինամթերք և զինվորների համար նախատեսված պարենամթերք պահելու մեղադրանքով։ ՀՀ կառավարության հունիսի 18-ի նիստում որոշում կայացվեց հունիսի 19-ին գումարել ԱԺ արտահերթ նիստ, որում քննարկման կդրվի պատգամավոր Մանվել Գրիգորյանին անձեռնմխելիությունից զրկելու հարցը: Կառավարության որոշման մեջ նշվում է, որ արտահերթ նիստում քննարկման կդրվի Գրիգորյանի նկատմամբ քրեական հետապնդում հարուցելուն և նրան ազատությունից զրկելուն համաձայնություն տալու մասին Հայաստանի Հանրապետության գլխավոր դատախազի միջնորդագիրը:
Գրիգորյանի նկատմամբ քրեական գործ է հարուցվել ապօրինի զենք-զինամթերք պահելու կասկածանքով։ Պատգամավորի ձերբակալության մասին համապատասխան կարգով տեղեկացվել է ԱԺ նախագահ Արա Բաբլոյանը։
ԱԱԾ-ն հունիսի 17-ին տեսանյութ է հրապարակել` ներկայացնելով ՀՀ Արմավիրի մարզի Արշալույս գյուղի Լճափնյա փողոցում գտնվող, Մանվել Գրիգորյանին սեփականության իրավունքով պատկանող հանգստյան գոտում, ինչպես նաև Էջմիածին քաղաքի Ալավերդյան փողոցի տուն 46 հասցեում տեղակայված և Գրիգորյանին պատկանող առանձնատան կատարված խուզարկության արդյունքները:
Տեսանյութում երևում է, որ Մանվել Գրիգորյանին պատկանող հանգստյան գոտին վերածվել էր զինապահեստի, ռետրո և ժամանակակից տասնյակ ավտոմեքենաների ավտոպարկի: Ակնալճի ամառանոցը գեներալի համար ծառայել է նաև «զինվորի բաժին» նշագրումով սննդի, հիգիենիկ պարագաների, դեղորայքի, զինվորական հանդերձանքի պահեստարանի: Զինվորներին հասցեագրված արկղերին կից նամակներից ակնհայտ էր, որ արկղերի պարունակությունը դեռևս 2016-ին ապրիլյան քառօրյա պատերազմի օրերին ուղարկված օգնությունն էր առաջնագծի զինվորներին: Զինվորական շապիկներ, գուլպաներ, դեղորայք, բինտեր, վիրակապեր դեղահաբեր…
Գրիգորյանն այս պահին ձերբակալված է։ Նրա որդին` Կարեն Գրիգորյանը, հրաժարվել է Էջմիածնի քաղաքապետի պաշտոնից։
Հետևեք մեզ Viber-ում
