«Այդ կարգավորումն ակնհայտ անտրամաբանական է». Արթուր Դավթյանը՝ ԱԺ կանոնակարգ օրենքում ներքին հակասության մասին
« Անձին կարելի է ձերբակալված վիճակում պահել 72 ժամից ոչ ավելի եւ եթե անհրաժեշտություն է առաջանում ավելի երկար պահել կամ քրեական հետապնդում հարուցել, դրա համար անհրաժեշտ է ստանալ ԱԺ համաձայնությունը: Հիմա քրգործով կան բավարար հիմքեր, որ ԱԺ պատգամավորի նկատմամբ հարուցվի քրեական հետապնդում եւ նրան ազատությունից զրկելու անհրաժեշտություն է առաջացել: Քանի որ մենք դա չենք կարող անել առանց ԱԺ համաձայնության, խնդիր է դրված հրավիրել ԱԺ արտահերթ նիստ, այդ համաձայնությունն ստանալու համար»,-կառավարության արտահերթ նիստում հայտարարեց ՀՀ վարչապետ Նիկոլ Փաշինյանը՝ անդրադառնալով ԱԺ ՀՀԿ խմբակցության պատգամավոր Մանվել Գրիգորյանին անձեռնմխելիությունից զրկելու հարցին: «Մեր կողմից մանրամասն ուսումնասիրվել է ԱԺ կանոնակարգ օրենքը: Առաջին հայացքից կարող է տպավորություն ստեղծվել, որ հակասության հետ գործ ունենք: Իրականում մենք գործ ունենք նույն օրենքի մեջ ներքին հակասության հետ: Հակասում է ընդհանուր սկզբունքային կարգավորումը որեւէ մասնավոր նորմի, որի կարգավորումն ակնհայտ անտրամաբանական է. որեւէ կերպ չի բխում օրենքի կարգավորման ընդհանուր ոգուց, այնպես էլ սահմանադրաիրավական կարգավորումների հստակ մեկնաբանություններից: Օրենքում առկա դրույթների համադրության արդյունքում լիարժեք բավարար են հիմքերը՝ իրավաչափ համարել արտահերթ նիստով այս հարցի քննարկումը»,- անդրադարձավ ԱԺ կանոնակարգ օրենքի այն դրույթին, ըստ որի ԱԺ պատգամավորին անձեռնմխելիությունից զրկելու հարցը պետք է քննրկվի ԱԺ հերթական նիստում, մինչդեռ այս դեպքում՝ հարցը քննվելու է արտահերթ նիստում ասաց գլխավոր դատախազ Արթուր Դավթյանը: ՀՀ վարչապետը նաեւ տեղեկացրեց, որ ԱԺ արտահերթ նիստ հրավիրելու հարցով ունի ԱԺ նախագահ Արա Բաբլոյանի բանավոր համաձայնությունը: Նշենք, որ ՀՀ գլխավոր դատախազ Արթուր Դավթյանը դիմել է ՀՀ վարչապետ Նիկոլ Փաշինյանին՝ ՀՀ ԱԺ պատգամավոր Մանվել Գրիգորյանի նկատմամբ քրեական հետապնդում հարուցելուն և նրան ազատությունից զրկելուն համաձայնություն տալու մասին ՀՀ գլխավոր դատախազի միջնորդությունը քննարկելու օրակարգով ՀՀ կառավարության նախաձեռնությամբ Ազգային ժողովի արտահերթ նիստ գումարելու համար:
Հետևեք մեզ Viber-ում
