Ալիևն անուղղելի է. ստորացումների և բռնաճնշումների շքերթ

Ադրբեջանի Գերագույն դատարանը օրերս մերժեց մի շարք անկախ լրատվամիջոցների` այդ թվում «Ազատություն» ռադիոկայանի ադրբեջանական ծառայության պաշտոնական կայքի արգելափակումը երկրի տարածքում դադարեցնելու հայցը: «Ազատության» ադրբեջանական ծառայությունից բացի, երկրի տարածքում արգելափակված են նաև Azerbaycan Saati և Turan TV ինտերնետային հեռուստաընկերությունների և «Ազադլըղ» թերթի կայքերը: Առաջին ատյանի դատարանը ընդդիմադիր կայքերի արգելափակման մասին որոշումը կայացրել էր 2017 թվականի մայիսին: Անցած դեկտեմբերին Բաքվի քաղաքային վերաքննիչ դատարանը այս որոշումն ուժի մեջ էր թողել: Հիշեցնենք, անցյալ տարի ապրիլին Ադրբեջանում երկրի ինտերնետ տրամադրող ամենամեծ ընկերություններից մեկը՝ «Դելտա Տելեկոմ»-ը արգելափակեց «Ազատություն» ռադիոկայանի ադրբեջանական ծառայության կայքէջ այցելությունը։ Արգելափակվում էին նաև «Մեյդան TV» հեռուստաընկերության և «Ազադլիք» թերթի կայքերը։ Արգելափակումը հաջորդեց «Ազատության» կողմից Ադրբեջանի նախագահ Իլհամ Ալիևի և նրա մերձավորների ֆինանսական գործունեության մասին հետաքննության հրապարակմանը։ Ահա, երեկ «Ազատ Եվրոպա/Ազատություն» ռադիոկայանը խստորեն քննադատել է Ադրբեջանի Գերագույն դատարանի հունիսի 4-ին կայացրած որոշումը, ըստ որի ուժի մեջ մնաց «Ազատության» կայքէջը արգելափակելու՝ Ադրբեջանի կառավարության որոշումը: «Ազատություն» ռադիոկայանը գտնում է, որ դա պետական իշխանության բութ գործիքի օգտագործում է անկախ լրատվամիջոցներին ճնշելու համար: «2014 թվականին, երբ Ադրբեջանի իշխանությունները Բաքվում փակեցին մեր գրասենյակը՝ առանց հաշվի առնելու օրենսդրական ու իրավական նորմերը, մենք գիտակցեցինք, որ մենք ու բոլոր անկախ լրատվամիջոցները թիրախի տակ ենք», - ասել է «Ազատ Եվրոպա/Ազատություն» ռադիոկայանի նախագահ Թոմաս Քենթը՝ նշելով, որ Գերագույն դատարանի որոշումը հաստատում է դա: «Ազատություն» ռադիոկայանը գտնում է, որ դա հարձակում է մամուլի ազատության վրա, և հայտնում է, որ կշարունակի օգտագործել բոլոր հասանելի ուղիները այդ որոշումը վիճարկելու համար: Ալիևի նկատմամբ որևէ «պատժամիջոց», ինչպես երևում է, ազդեցություն չի ունենում, նա ողջ թափով շարունակում է բռնատիրական որոշումներ կայացնել: Վերջերս օրինակ, Human Rights Watch մարդու իրավունքների կազմակերպությունը Եվրամիությանը կոչ արեց Ադրբեջանի կառավարության նկատմամբ ճնշումներն ուժեղացնել, որպեսզի լուծեն քաղբանտարկյալների խնդիրը։ Կազմակերպության ներկայացուցիչ Կատերին Պիլիշվիլին Human Rights Watch-ի կայքում գրել էր, որ Ադրբեջանի իշխանությունները մեծ խոստումներ են տվել մայիսին ստորագրված համաներման հրամանագրից առաջ, բայց այդ խոստումները չեն կատարվել: «Ադրբեջանում քաղբանտարկյալների բացարձակ մեծամասնությունը շարունակվում է մնալ ազատազրկված»,-գրել է կազմակերպության պաշտոնյան: Ադրբեջանի իշխանությունները մայիսին ստորագրված համաներման հրամանագիրն ամիսներ շարունակ շահարկել են, և դրանով խուսափել մարդու իրավունքների վիճակի վերաբերյալ քննադատություններից: «Ադրբեջանի իշխանություններն այդ հրամանագրով մեծ արդյունքներ էին խոստանում, բայց դա տեղի չունեցավ: Հրամանագրով ազատ է արձակվել, ընդհանուր առմամբ ԢԡԢ մարդ, որոնցից միայն 12-ն են համարվում քաղբանտարկյալներ»,-նշված է պաշտոնյայի գրառման մեջ: Կատերին Պիլիշվիլին դիմելով Եվրամիությանը կոչ է արել հստակ քայլեր ձեռնարկել քաղբանտարկյալների ազատ արձակման համար Ադրբեջանի իշխանությունների վրա ազդելու ուղղությամբ. «ԵՄ-ին կոչ ենք անում Ադրբեջանի քաղբանտարկյալների և «խղճի բանտարկյալների» ազատ արձակման ուղղությամբ հաստատուն քայլեր ձեռնարկել: Նշենք նաև մի ուշագրավ լուր ևս. ադրբեջանական ոստիկանությունը հունիսի 4-ին անհայտ պատճառներով ձերբակալել է 3 օր առաջ ԱՄՆ-ից վերադարձած ադրբեջանցի իրավապաշտպան Էմին Ասլանին: Իրավապաշտպանի հարազատները գրավոր դիմում են ներկայացրել ոստիկանություն նրա ձերբակալության հանգամանքները ճշտելու նպատակով: Անհայտ է նաև, թե ոստիկանական, որ տեղամաս կամ բաժանմունք է տեղափոխվել Էմին Ասլանը: Էմին Ասլանը 2014-ից բնակվում էր Վրաստանում: ԱՄՆ-ի Սիրակուզի համալսարան ընդունվելուց հետո նա տեղափոխվել էր Ամերիկայի Միացյալ Նահանգներ ուսանելու և Բաքու էր վերադարձել 3 օր առաջ: Մետաքսյա Շալունց