«Ի՞նչ է կատարվում Հայաստանի բենզինի շուկայում»

Այսօր ԱԺ նիստում ՏՄՊՊՀ 2016 թ. գործունեության ծրագրի քննարկման ժամանակ պատգամավոր Նիկոլ Փաշինյանը ՏՄՊՊՀ նախագահ Արտակ Շաբոյանից հետաքրքրվեց, թե ի՞նչ է կատարվում Հայաստանի բենզինի շուկայում:Նա  հիշեցրեց, որ 2013 թվականին Հայաստանն ու Ռուսաստանը պայմանագիր ստորագրեցին, որտեղ նշվում էր, որ ՌԴ-ն Հայաստանին արտոնյալ պայմաններով նավթամթերք է տալիս: Դրանից հետո Հայաստանը մուտք գործեց ԵՏՄ, բայց այսօր ունեն մի իրողություն, որ Վրաստանում բենզինի գինը Հայաստանի գնից էական էժան է: «Մյուս կողմից, Հայաստանում հայտնվել է մի սուբյեկտ՝ Ռոսնեֆտ Արմենիա, որը 2015 թվականին 15 մլրդ դրամի շահույթ է ստացել: Հասկանալի չէ, թե ինչով է զբաղվում այս ընկերությունը, մամուլում նշվում է, որ ուղղակի Ռոսնեֆտից վառելիք է  վերցնում ու մատակարարում հայկական ընկերություններին: Արդյունքում հսկայական շահույթ է ստանում»,- ասաց Փաշինյանը: Ա.Շաբոյանը վստահեցրեց, որ բենզինի ոլորտը գտնվում է ՏՄՊՊՀ ուշադրության կենտրոնում, մշտական հաշվարկներ են անում, որ գերիշխող դիրք զբաղեցնող ընկերությունները գնի չհիմնավորված բարձրացումներ թույլ չտան: Նա նշեց, որ 2014թ. սկզբից մինչ 2015թ. տարեվերջ, երբ աշխարհում բենզինի գները նվազեցին, Հայաստանում նույնպես մեծ չափով նվազեցին՝ 480 դրամից հասնելով 380 դրամի («Ռեգուլյար» տեսակը): ՏՄՊՊՀ նախագահի խոսքով՝ բենզինն արտարժույթով է ներկրվում, իսկ փոխարժեքը կարևոր ազդեցություն ունի, և այս 2 տարվա ընթացքում մոտ 18%-ով փոխարժեքը նվազել է և իր ազդեցությունն ունի բենզինի գնի վրա. «Եթե փոխարժեքի գործոնը հանենք, ապա Հայաստանում բենզինի գները նվազել են մոտ 32%-ով: Եվ վաճառքի գների նվազումը մեծ մասով ադեկվատ է ձեռքբերման գների նվազմանը: Այսինքն՝ այս տեսանկյունից մենք ներկրող ընկերությունների կողմից չարաշահումներ չենք տեսնում, ձեռքբերման և վաճառքի տարբերությունը՝ մարժան, կայուն է և գտնվում է ողջամիտ շահութաբերության շրջանակներում»: