Եթե նույնիսկ ՀՀԿ խմբակցությունում մեկ պատգամավոր մնա, Գևորգ Կոստանյանը կլինի երկրորդը

ԱԺ ՀՀԿ խմբակցության պատգամավոր Գևորգ Կոստանյանը մեկնաբանել է ՀՀԿ-ն լքելու պատգամավորների որոշումը: «Իմ գործընկերների քայլերի բարոյական կողմին չանդրադառնամ, բայց եթե ես կուսակցական լինեի ու խմբակցության կազմը լքեի, մանդատս վայր կդնեի: Պառլամենտում դու հայտնվել ես այդ կուսակցության քվոտայով»,- ասել է նա: Հարցին՝ ունե՞ք մտադրություն դուրս գալու ՀՀԿ խմբակցությունից, պատասխանել է՝ ոչ. «Ուզում է մեկ հոգի մնա, ես դուրս չեմ գա... Խմբակցությունից դուրս գալու իմ որոշումը կարող է լինել մեկ դեպքում, եթե ես որոշեմ վայր դնել իմ մանդատը»: Տեղեկացնենք, որ Սամվել Ալեքսանյանը խմբակցությունը լքած 6-րդ պատգամավորն էր Շիրակ Թորոսյանից, Արթուր Գևորգյանից, Արտակ Սարգսյանից, Արման Սահակյանից ու Ֆելիքս Ցոլակյանից հետո։ ՀՀԿ-ն 105 հոգանոց խորհրդարանում ուներ 58 հոգանոց խմբակցություն։ Այժմ խմբակցությունն ունի 52 անդամ և փաստացի կորցրել է մեծամասնությունը՝ 52/53 համամասնությամբ: